مہذب قوموں میں کبھی بھی احتسابی عمل میں حکومتی وزرا مداخلت نہیں کرتے، حکومتی بدیانتی عیاں ہوچکی ہے، اصغر خان
پیرس(نمائندہ خصوصی) مسلم لیگ ن یوتھ ونگ فرانس کے صدر اصغر خان نے کہا ہے کہ کسی بھی ترقی یافتہ مہذب قوم میں حکومتی وزرا اوراثرورسوخ کے تلے احتساب کرنے والے ادارے کام نہیں کرتے۔ یہاں فیصلہ بعد میں آتا ہے حکومتی وزرائ پہلے اعلان کردیتے ہیں ۔ تفتیش بعد میں شروع ہوتی ہے حکومت اس کو پہلے عیاں کررہی ہے اس سے صاف ظاہر ہے کہ سب کچھ ایک گھنائونی سازش کے تحت کیا جارہا ہے مقصد صرف اپنی نااہلی چھپانا ہے۔
انہوں نے کہا کہ حکومتی بددیانتی عیاں ہوچکی ہے وہ دن دور نہیں جب کنٹینر پر چڑھ کر کی گئی تقریریں اسی حکومت کے آگے آئیں گی اور وہی انقلاب اس حکومت کے خلاف برپا ہوگا جس کی نوید وہ گزشتہ پانچ سالوں سے قوم کو سنا رہے ہیں۔ عوام کا سونامی آئیگا اور ظلم کی حکومت کو بہا کر لے جائیگا۔
