ممبئی (جیوڈیسک) بالی ووڈ حسینہ ایشوریا رائے بچن ان دنوں اپنی نئی فلم ’’ جذبہ ،، کی شوٹنگ میں مصروف ہیں، اس فلم سے وہ بالی ووڈ میں دوبارہ اپنی نئی اننگز کا آغاز کر رہی ہیں جب کہ اس کی دیگر کاسٹ میں عرفان خان، شبانہ اعظمی، انوپم کھیر، اتل کلکرنی اور چندن رائے سانیال شامل ہیں جب کہ اس فلم کو اکتوبر میں ریلیز کرنے کا سوچا جا رہا ہے۔
گزشتہ روز ایشوریا رائے ممبئی کے علاقہ اندھیری میں قائم ڈونگر اسکریپ یارڈ میں ایک سین فلم بند کرواتے دیکھی گئی ہیں جب کہ اندھیری کا یہ علاقہ مشینری اور کاروں کے اسکریپ کی وجہ سے مشہور ہے اور یہاں سلیبرٹیز بہت ہی کم نظر آتی ہیں مگر ایشوریا رائے نے پروفیشنل ہونے کا ثبوت دیتے ہوئے گزشتہ روز یہاں آنے میں کوئی ہچکچاہٹ محسوس نہیں کی اور فلم کا سین عکسبند کروایا۔ ایشوریا کے آنے سے قبل علاقے بھر میں سکیورٹی بڑھا دی گئی تھی۔
فلم ’’ جذبہ ،، میں ایشوریا رائے بچن ایک خاتون وکیل کا کردار ادا کر رہی ہیں جب کہ عرفان خان ایک معطل پولیس افسر کا کردار ادا کر رہے ہیں۔ دوسری طرف فلم کے ذرائع کا کہنا ہے کہ فلمساز سنجے گپتا اپنی اس ایکشن فلم ’’جذبہ ‘‘ کی پہلی جھلک اگلے ماہ اپریل میں ریلیز کر رہے ہیں۔ ایشوریا رائے بچن کی شادی کے بعد یہ پہلی فلم ہو گی اسی لیے مداحوں کو اس کا شدت سے انتظار ہے جب کہ دوسری طرف فلم ساز بھی اسے جلد از جلد مکمل کرنے کی کوشش کر رہے ہیں۔
