اسلام آباد: قومی اسمبلی میں قائد حزب اختلاف خورشید شاہ کا کہنا ہے کہ عمران خان سیاست میں پورس کا وہ ہاتھی ہے جو اپنی ہی فوجوں کو کچل کر دشمن کی فتح کی راہ ہموار کرتا ہے کیونکہ انہوں نے ہمیشہ نوازشریف کی سیاست کو مضبوط کیا ہے۔
پارلیمنٹ ہاؤس اسلام آباد میں میڈیا سے بات کرتے ہوئے خورشید شاہ نے کہا کہ سیاست میں لیڈر آگے اور کارکن پیچھے ہوتاہے لیکن یہاں لوگ لاٹھیاں کھارہے تھے اور لیڈر کمرے سےباہر ہی نہیں نکلا، لاٹھیاں پیپلزپارٹی کے کارکن ہی کھاسکتے ہیں کیونکہ سیاست میں لیڈر ہمیشہ آگے ہوتے ہیں ، بے نظیر کبھی جیل کی زمین پر سوئی اور کبھی لیاقت باغ میں گولی کھاتے ملیں گی۔ ان کا کہنا تھا کہ عمران خان کے پہاڑی سے نہ اترنے کی وجہ سے کارکن باہر نہیں نکلا جب کہ سیاسی ورکر اور کارکن مارکھارہے تھے لیکن ان کے کپتان کمرے سے باہر نہ آئے۔
پیپلز پارٹی کے رہنما کا کہنا تھا کہ عمران خان ہماری سیاست میں پورس کا وہ ہاتھی ہے جو اپنی ہی فوجوں کو کچل کر دشمن کی فتح کی راہ ہموار کرتا ہے، انہوں نے ہمیشہ نوازشریف کی سیاست کو مضبوط کیا ہے۔ انہوں نے کہا کہ عمران خان اپنے کارکنوں کو دھرنوں اور احتجاج میں استعمال کرتے ہیں اور اس بار انہیں کے پی کے سے حسب توقع مدد نہیں ملی، عمران خان نے فیس سیونگ کے لیے سپریم کورٹ کا سہارا لیا اور اگر وہ پہلے ہی روز سپریم کورٹ کے اقدام پہ نکلتےتو اچھا ہوتا۔
