World Cup

ورلڈ ٹی ٹوئنٹی کا یہ اہم میچ دونوں ٹیموں کے لیے جیتنا ضروری ہے ، کولکتہ میں کرکٹ کی تاریخی جنگ شام سات بجے چھڑے گی
کولکتہ (یس اُردو) ورلڈ ٹی ٹوئنٹی کے اہم میچ میں آج پاکستان اور بھارت کی ٹیمیں مدمقابل ہوں گی ، ٹائیگرز کو نوچ کر زخمی کرنے والے قومی شاہین آج سورماؤں کی ” ایسی کی تیسی ” کرنے کے لیے تیار ہو گئے ۔
ایشیا کپ ٹی ٹوئنٹی میں خراب پرفارمنس کی وجہ سے شدید تنقید کا سامنا کرنے والے بوم بوم آفریدی نے بدھ کو کولکتہ میں ہی بنگلہ دیش کے خلاف افتتاحی میچ میں گیند اور بلے کے ساتھ بہترین کارکردگی دکھائی تھی۔گھر کے شیروں کو گھر میں ڈھیر کرنے کا موقع آگیا ، دلوں کو تھام لو ، دھونی الیون کی دھلائی کا وقت آگیا ، ورلڈ ٹی 20 کا سب سے بڑا امتحان مشن کولکتہ میں بھارت اور پاکستان آمنے سامنے ہوں گے ۔سپر ٹین مرحلے کے افتتاحی میچ میں کیویز نے بھارتی سورماوں کا غرور خاک میں ملا دیا تھا ، ایک سوستائیس رنز کے ہدف کے تعاقب میں دھونی الیون اناسی رنز پر ڈھیر ہو گئی تھی ۔جبکہ گرین شرٹس نے بنگال ٹائیگرز کو پچپن رنز سے مات دے کر ورلڈ ٹی ٹوینٹی میں فاتحانہ آغاز کیا، بوم بوم آفریدی نے انچاس رنز کی دھواں دار اننگز کھیلنے کے بعد دو وکٹیں بھی اڑائیں ۔بنلگہ دیش کیخلاف میچ میں کامیابی کے بعد پاکستانی ٹیم کا مورال بلند ہے اور وہ یقینی طور پر انڈیا پر ایک نفسیاتی برتری رکھتے ہیں ۔ جبکہ انڈیا کی ٹیم افتتاحی میچ نیوزی لینڈ سے ہارنے کے بعد اس میچ میں کم بیک کرنے کی کوشش کرے گی ۔مختصر فارمیٹ کے بڑے میچ کے دوران موسم بھی اپنا رنگ خوب دکھائے گا، رپورٹس کیمطابق آج کولکتہ میں تیز ہواؤں کیساتھ گرج چمک کا بھی امکان ہے، کم سے کم درجہ حرارت 26 ڈگری سینٹی گریڈ اور زیادہ سے زیادہ 33 ڈگری سینٹی گریڈ تک رہے گا ۔ آسمان پر گرج چمک کے علاوہ گراؤنڈ میں بھی شائقین کو خوب طوفانی پرفارمنسز دیکھنےکا موقع ملے گا ۔