کراچی: نیشنل اسٹیڈیم کراچی کو اپ گریڈ کرنے کا کام شروع ہو گیا، میدان سے گھاس ہٹا دی گئی، پچز بھی بین الاقوامی معیار سے مطابقت نہیں رکھتی تھیں۔
کراچی کے نیشنل اسٹیڈیم میں ایک ارب روپے سے زائد رقم سے تعمیر نو اور تزئین و آرائش کے کام کا آغاز ہوگیا، مالی فنڈز کی عدم دستیابی اور بورڈ حکام کی پہلو تہی کے سبب خستہ حالی کا شکار ہونے والے اسٹیڈیم کی تعمیر و تزئین کیلیے 10 ماہ کے تعمیراتی پروجیکٹ کا مقصد اسے اگلے پی ایس ایل میچز کیلیے تیار کرنا ہے، کثیر لاگت منصوبے کے پہلے حصے میں گراؤنڈ پر لگی ہوئی گھاس کو نکال دیا گیا ہے۔ کنٹریکٹ پانے والے ادارے نے لاہور کے قذافی اسٹیڈیم میں چیف کیوریٹر کی حیثیت سے ریٹائرڈ ہونے والے سیالکوٹ میں مقیم 75 سالہ عبدالغنی کی خدمات حاصل کرلی ہیں، 46 سالہ تجربے کے حامل عبدالغنی کا کہنا ہے کہ آؤٹ فیلڈ کو انگلینڈ جیسا بنائیں گے۔
