واشنگٹن : ری پبلکن صدارتی امیدوار ڈونلڈ ٹرمپ کا کہنا ہے کہ صدر منتخب ہوا تو تارکین وطن کی امریکا آمد بند کر دوں گا ۔ ادھر امریکی صدر باراک اوباما کی اہلیہ مشیل کا کہنا ہے کہ ہلیری اوباما اور بل سے بھی بہتر صدر ثابت ہونگی ۔ امریکی ریاست اوہائیو میں انتخابی ریلی سے خطاب کرتے ہوئے ڈونلڈ ٹرمپ کا کہنا تھا کہ صدر بننے کی صورت میں وہ امریکی عوام کی زندگیوں کو خطرات سے دوچار نہیں ہونے دیں گے اور دہشت گردی کا شکار ممالک سے لوگوں کے امریکا امیگریشن کا پروگرام معطل کردیں گے ۔ ادھر امریکی خاتون اول مشیل اوباما نے شمالی کیرولائنا میں پہلی بار ہلیری کلنٹن کے ساتھ انتخابی ریلی میں شرکت کی ۔ مشیل اوباما نے ریلی سے خطاب کرتے ہوئے کہا کہ ووٹرز ابتدائی ووٹنگ کی سہولت سے فائدہ اٹھائیں ۔ خاتون اول نے ٹرمپ پر تنقید کرتے ہوئے کہا کہ کچھ لوگ دھاندلی کا شور مچا رہے ہیں ۔ ان کا کہنا تھا کہ ہلیری اوباما اور بل کلنٹن سے بھی بہتر صدر ثابت ہوں گی ۔ ادھر لاس اینجلس میں واک آف فیم سے ڈونلڈ ٹرمپ کا ستارہ توڑنے والے شخص کو پولیس نے گرفتار کرلیا ۔