لاہور : پاکستان ٹیم کے دورہ زمبابوے کا شیڈول طے پا گیا، گرین شرٹس 22 ستمبر کو ہرارے میں ڈیرے ڈال دینگے۔
زمبابوے نے رواں سال پاکستان کا دورہ کرکے 6سال سے ویران سونے میدان آباد کئے تھے، اس دوران مہمان ٹیم نے سخت سیکیورٹی حصار میں3 ٹی ٹوئنٹی اور اتنے ہی ون ڈے میچز کھیلے،گرین شرٹس نے زمبابوے کا جوابی دورہ کرنا تھا جس کیلیے بعد ازاں 17اگست سے 7ستمبر تک شیڈول بھی طے کرلیا گیا، اس دوران پاکستان کو اپنی رینکنگ بہتر بنانے اور چیمپئنز ٹرافی میں جگہ پکی کرنے کیلیے کیلیے سری لنکا کیخلاف ون ڈے سیریز جیتنے کا چیلنج درپیش آگیا۔
آئی لینڈرز کو 9سال سے ہوم گراؤنڈز پر زیرکرنے میں ناکام گرین شرٹس کی فارم کو دیکھتے ہوئے اس بار بھی بڑی توقعات وابستہ نہیں تھیں، اس لیے منی ورلڈکپ میں شرکت کی ایک اور امیداور ٹیم ویسٹ انڈیزسمیت زمبابوے میں ٹرائی سیریز کا پلان بھی بنا لیا گیا، سری لنکا میں اظہر علی کی زیرقیادت پاکستان ٹیم نے ون ڈے سیریز جیت کی ایک درجہ ترقی کیساتھ عالمی رینکنگ میں آٹھویں نمبر پر جگہ بنائی، چیمپئنز ٹرافی میں شرکت کیلیے 31 ستمبر تک اسی پوزیشن کا برقرار رہنا ضروری ہے۔
اس سے قبل کیریبیئنز کی کوئی سیریز شیڈول نہیں ہے، ان سے کھیلنے کی صورت میں چند میچز میں شکست ایک بار پھر گرین شرٹس کی تنزلی کا باعث بن سکتی تھی،کیونکہ کوئی باقاعدہ معاہدہ نہیں ہوا تھا، اس لیے پی سی بی نے پہلے ٹرائی سیریز کا منصوبہ ختم کیا، بعد ازاں زمبابوے کیساتھ بات چیت کرکے پاکستان ٹیم کا دورہ بھی موخرکردیا گیا۔
نئے پلان میں گرین شرٹس کے ون ڈے میچ بھی ٹی ٹوئنٹی کے بعد رکھے گئے تاکہ 31ستمبر کی کٹ آف ڈیٹ سے قبل رینکنگ پر کوئی منفی اثر پڑنے کا خدشہ نہ رہے۔
