Pakistan and New Zealand

ویلنگٹن………پاکستان اور نیوزی لینڈ کے درمیان جاری 3ٹی 20میچوں پر مشتمل سیریز کا تیسرا اور آخری میچ آج ویلنگٹن میں کھیلا جارہا ہے ۔میچ پاکستان وقت کے مطابق صبح 11 بجے شروع ہوگا۔
انگلینڈ کے ہاتھوں ٹی 20 سیریزتین صفر سے وائٹ واش ہونے کے بعد پاکستانی کرکٹ ٹیم کو مسلسل دوسری سیریز میں شکست سے بچنے کے لئے نیوزی لینڈ کو آج کے فیصلہ کن معرکے میں ہر صورت میں شکست دینا ضروری ہے۔دونوں ٹیموں کے درمیان فیصلہ کن معرکہ میں کانٹے کا مقابلہ متوقع ہے۔ دونوں ٹیموں کو سیریز کے بعد ٹی 20 ورلڈ کپ کے لئے اپنی ٹیموں کو حتمی شکل دینا ہے۔ شاہد آفریدی نیوزی لینڈ میں اپنی آخری سیریز میں کامیابی کی خواہش ظاہر کی ہے۔2010-11میں نیوزی لینڈ نے پاکستان کے خلاف سیریز میں 1-2سے کامیابی حاصل کی تھی۔ تین میچوں کی یہ سیریز اس وقت ایک ایک سے برابر ہے۔امکان ہے کہ آؤٹ آف فارم صہیب مقصود اور عمرگل کی جگہ محمد رضوان اور انور علی کو موقع دیا جائے گا۔ پاکستان کے نقطہ نظر سے اوپنر احمد شہزاد کی فارم بھی تشویش کا سبب بنی ہوئی ہے جو دونوں میچوں میں صرف 16 اور نو رنز بنانے میں کامیاب ہو سکے ہیں۔ اچھی خبر یہ کہ فاسٹ بولر وہاب ریاض فٹ ہوچکے ہیں۔ نیٹ پریکٹس کے دوران ان کے بازو پر گیند لگی تھی۔ ہیڈ کوچ وقار یونس نے حکمت عملی مکمل کرلی ہے۔ ویلنگٹن میں دونوں ٹیموں کے لئے میچ ڈو اینڈ ڈائی ہوگا۔ پاکستان کرکٹ ٹیم نے 2 دن ویلنگٹن میں بھر پور پریکٹس کی ہے۔ پاکستان ٹیم نے دو دن میں اپنے تمام ہتھیاروں کو چیک کر لیا ہے اور تمام کھلاڑی مکمل فٹ ہیں۔ادھر کیویز ٹیم میں جارحانہ بیٹسمین برینڈن میک کولم کو اہم میچ کے لئے طلب کرلیا گیا ہے۔ آئی سی سی ٹی ٹوئنٹی رینکنگ میں قومی ٹیم چھٹے اور نیوزی لینڈ معمولی فرق سے ساتویں پوزیشن پر براجمان ہے اور سیریز کا تیسرا میچ جیتنے والی ٹیم ٹی ٹوئنٹی رینکنگ میں پانچویں پوزیشن پر آجائے گی۔