زندگی میں بس ایک ہی چیز کا پچھتاوا ہے کہ تعلیم حاصل نہیں کر سکا

پشاور(مانیٹرنگ ڈیسک) سوشل میڈیا میں ایسی طاقت ہے کہ آن کی آن میں لوگوں کو شہرت کی بلندیوں تک پہنچا سکتاہے۔ زیادہ پرانی بات نہیں ہے جب سوشل میڈیا نے نیلی آنکھوں والے ارشد خان نامی چائے بیچنے والے نوجوان کو راتوں رات سٹار بنا دیا تھا اور وہ پاکستان سمیت دنیا بھرمیں کروڑوں دلوں کی دھڑکن بن گئے۔ اب ارشد چائے والا نے اپنے سوشل میڈیا اکاﺅنٹ پر ایک نئی ویڈیو پوسٹ کی ہے جس میں انہوں نے ایسی چیز پر پچھتاوے کا اظہار کیا ہے کہ سن کر آپ بھی افسردہ ہو جائیں گے۔ ویب سائٹ ’مینگوباز‘ کے مطابق ارشد چائے والا نے اس ویڈیو میں کہا ہے کہ انہیں زندگی میں ایک ہی چیز پر پچھتاوا ہے کہ وہ تعلیم حاصل نہیں کر سکے۔ ان کا کہنا تھا کہ انہیںاپنی تعلیم کی کمی کا احساس ہے اور اس پر بہت افسوس بھی ہوتا ہے۔

ویڈیو میں ارشد خان نے مداحوں کو پیغام دیتے ہوئے کہا کہ ”جس شعبے میں بھی آپ جانا چاہتے ہیں ،سب سے پہلے اپنی پڑھائی مکمل کریں کیونکہ آج مجھے بہت افسوس ہو رہا ہے کہ میں نے اپنی پڑھائی مکمل نہیں کی۔“ واضح رہے 20 سالہ ارشد خان کا تعلق ایک پٹھان فیملی سے ہے اور ان کے 17 مزید بہن بھائی ہیں۔ ارشد خان نہ کبھی سکول گئے اور نہ ہی ان کا کوئی تعلیمی پس منظرہے۔ وہ محض 14 سال کی عمر سے ہی اسلام آباد میں کام کررہے تھے۔انہوں نے ایک انٹرویو میں اس بات کی نشاندہی کی تھی کہ ان کی دیہاڑی 500 روپے ہے۔اس حساب سے وہ ماہانہ 15000 روپے کماتے ہیں۔ شہرت پانے کے بعد ایک انٹرویو میں انہوں نے کہا تھا کہ وہ اداکار یا ماڈل بننے میں کوئی دلچسپی نہیں رکھتے اور مستقبل میں چائے بیچنے کو ہی ترجیح دیں گے تاہم بعد میں ان کا ذہن بدل گیا اور انہوں نے فلموں میں کام کرنے کی خواہش کا اظہار کردیاتھا۔

https://www.instagram.com/p/BlOYjVRBY26/?utm_source=ig_embed