پیرس ؍اسلام آباد(ایس ایم حسنین) تفصیلات کے مطابق مسلم لیگ ن یوتھ فرانس کے مرکزی راہنما صدر چوہدری محمد اصغر خان اورجنرل سیکرٹری چوہدری سجاد احمد ان دنوں لندن کے دورہ پر ہیں ۔ جہاں ان کی لندن میں سینئر پارٹی راہنمائوں سے ملاقاتیں ہوئیں اور ملکی سیاسی صورتحال اور پارٹی کے مستقبل کے لائحہ عمل پر تبادلہ خیال کیا گیا۔

اس موقع پر چوہدری محمد اصغر خان نے لیگی راہنمائوں کو پیرس میں مسلم لیگی راہنمائوں اورکارکنان کی ملکی معاشی اورسیاسی صورتحال پر تشویش سے آگاہ کیا اور کہا کہ اس وقت تمام لیگی قیادت کو پورے یورپ میں موثررابطوں کو مزید فروغ دینا چاہیے تاکہ پارٹی مزید متحد ہوسکے اور لیگی راہنمائوں کے خلاف حکومتی کارروائیوں پر موثر جوابی حکمت عملی بھی بنائی جاسکے۔ انھوں نے کہا کہ موجودہ حکومت عالمی سطح پر اپنی ساکھ بنانے میں ناکام ہے اور بمشکل دوست عرب ملکوں کی بھیک سے ملک کی معاشی گاڑی کو دھکا دے رہی ہے جس وجہ سے ملک میں بدترین معاشی صورتحال جنمم لے چکی ہے۔

چوہدری سجاد احمد جنرل سیکرٹری مسلم لیگ ن یوتھ نے کہا کہ عوام کے ذہن و دل بہت حساس ہوچکے ہیں اور وہ موجودہ حکومت کی شعبدہ بازیوں سے تنگ اپنی مفلوک الحالی کو رو رہی ہے اس لئے عوام کے جذبات کو مد نظر رکھتے ہوئے موثر احتجاجی تحریک کے ذریعے حکومت پر زور دینا چاہیے کہ وہ اپوزیشن کے بجائے اپنے کام پر توجہ دے اور کم از کم عوام کو آدھے ٹیکسوں سے نجات دلائے جو وہ پہلے سے ہی دوگنے کرتی جارہی ہے ۔

مسلم لیگ لندن کے راہنمائوں نے مستقبل کی حکمت عملی کیلئے سینئر قیادت سے مشاورت اور تمام یورپی تنظیمات کے کردار کی تجویز کو سراہا اور چوہدری محمد اصغر خان اور چوہدری سجاد احمد کے فرانس میں متحرک کردار کو سراہتے ہوئے ان کو مسلم لیگ ن کے مستقل کیلئے اہم قرار دیا۔