لاہور : پاکستان پیپلز پارٹی کے چیئرمین بلاول بھٹو زرداری نے کہا ہے کہ وہ مفاہمت پر نہیں مزاحمت پر یقین رکھتے ہیں اور پنجاب کے بلدیاتی انتخابات میں مسلم لیگ (ن) کی اینٹ سےاینٹ بجادیں گے۔
لاہور میں پیپلز پارٹی پنجاب کے عہدیداروں سے ملاقات کے دوران بلاول بھٹو زرداری نے کہا کہ وہ پنجاب کے تمام اضلاع کا دورہ کریں گے اگر وہ کہیں نا جاسکے تو وہاں کے کارکن انہیں اپنے درمیان ہی سمجھیں، ہم جمہوریت کی مضبوطی کی جدوجہد میں ساتھ ہیں، آخری فتح عوام کی ہی ہوگی۔
بلاول بھٹو زرداری کا کہنا تھا کہ کسان کنونشن کاجلد اعلان کیاجائےگا، پاکستان کے آئین کے مطابق کسانوں پر ود ہولڈنگ ٹیکس نہیں لگ سکتا، حکومت کی جانب سے عائد کردہ اضافی ود ہولڈنگ ٹیکس جگا ٹیکس ہے، جس کے خلاف قانونی مشاورت کے بعد عدالت سے رجوع کریں گے۔
پاکستان پیپلز پارٹی کے چیئرمین کا کہنا تھا کہ ہم مفاہمت پرنہیں مزاحمت پریقین رکھتےہیں، غریبوں کے حقوق کے لئے سڑکوں پر آنا پڑا تو آئیں گے، پنجاب کے بلدیاتی انتخابات میں مسلم لیگ (ن) کی اینٹ سےاینٹ بجادیں گے، الیکشن کمیشن ارکان سے متعلق ان کا کہنا تھا کہ اگر انہوں نے استعفے نہ دیئے تو ملک بھر میں بھرپور احتجاج کیا جائے گا۔
