پی ٹی آئی منشور سے ہٹ چکی، عمران خان کے فیصلوں میں یوٹرن بہت ہیں: عائشہ گلالئی

تحریک انصاف کی سابقہ رہنما عائشہ گلالئی نے لاہور پریس کلب میں میڈیا سے بات کرتے ہوئے سیاسی جماعتوں کو ہدف تنقید بنایا۔ عائشہ گلالئی نے کہا کہ آصف زرداری، نواز شریف اور عمران خان تینوں ملک کے لئے بہتر نہیں، اس وقت ملک کو قومی حکومت اور استحکام کی ضرورت ہے۔ ان کا کہنا تھا کہ تحریک انصاف اپنے منشور سے ہٹ چکی ہے۔ دوسروں پر کرپشن کے الزامات لگانے والے انہی کرپٹ عناصر کی مدد سے اپنی حکومت بنانا چاہتے ہیں۔ عائشہ گلالئی نے مزید کہا کہ بڑھتی ہوئی مہنگائی اور بے روزگاری کی وجہ کرپشن ہے۔ کرپٹ عناصر کا بلاامتیاز احتساب ہونا چاہیے۔ انہوں نے کہا ختم نبوت کا دھرنا نیک مقصد کے لئے تھا لیکن طریقہ کار غلط تھا، 22 دن اپنے ہی مسلمان بھائیوں کو آمد و رفت میں مشکلات کا سامنا رہا۔