Imran Khan

کراچی (جیوڈیسک) قومی اسمبلی کے حلقہ این اے 246 میں انتخابی مہم کے سلسلے میں پاکستان تحریک انصاف کا انتخابی جلسہ آج شام عائشہ منزل پر منعقد ہوگا ۔ تحریک انصاف کے چیئرمین عمران خان اور دیگر مرکزی قائدین خطاب کریں گے۔

کراچی سے قومی اسمبلی کے حلقے این اے 246 میں تحریک انصاف کے امیدوار عمران اسماعیل کی انتخابی مہم کے سلسلے میں جلسہ آج شام شاہراہ پاکستان عائشہ منزل پر ہوگا جس سے تحریک انصاف کے چیئرمین عمران خان اور دیگر مرکزی قائدین خطاب کریں گے جبکہ عمران خان کی اہلیہ ریحام خان بھی شرکت کریں گی ۔ جلسے کی تیاری کا کام جاری ہے ۔ شاہراہ پاکستان کو ٹریفک کے لئے بند کر دیا گیا ہے۔

جلسے کا سٹیج عائشہ منزل کے قریب کنٹیرز سے تیار کیا جا رہا ہے ۔ ہزاروں کرسیاں لگا دی گئی ہیں ۔ سیکورٹی کے لئے تین ہزار سے زائد پولیس اہلکار تعینات کئے جائیں گے۔ 8 ایس اپیز،16 ڈی ایس پیز اور 40 ایس ایچ اوز سیکورٹی ڈیوٹی پر مامور ہوں گے۔

سٹیج ، جلسہ گاہ اور اطراف کی سرچنگ کے لئے بم ڈسپوزل سکواڈ کی ٹیمیں خدمات انجام دیں گی ۔ سپیشل سیکورٹی یونٹ اور ریزرو فورس کے جوانوں کی خدمات بھی حاصل کی گئی ہیں ۔