دبئی………دنیا بھر کے سپر اسٹارز سے سجی پاکستان سپر لیگ کا دبئی میں رنگا رنگ آغازہوتےہی چوکوں اورچھکوں کی بھی برسات شروع ہوگئی ۔
پہلے میچ میں کوئٹہ گلیڈیئٹرز نے اسلام آباد یونائیٹڈ کو 8وکٹوں سے ہرا دیا ہے۔ کوئٹہ کی جانب سے لیوک رائٹ نے ناقابل شکست 86رنز بنائے۔لیوک رائٹ کی اننگز میں 11چوکے اور 4چھکے شامل تھے، تاہم اسلام آباد کی جانب سے عمران خالد نے 20رنز دے کر 2وکٹیں حاصل کیں۔اس سے پہلے کوئٹہ کی جانب سے محمد نواز نے 13رنز کےعوض4 کھلاڑیوں کو آؤٹ کیا اور مین آف دی میچ قرار پائے۔ اس موقع پر کوئٹہ گلیڈی ایٹرز کے کپتان سرفراز احمد کا کہنا تھا کہ ویورچرڈز کے ہونے کی وجہ سے ٹیم کو فائدہ ہوا، کھلاڑیوں نے بہترین کھیل کا مظاہرہ کیا۔ ادھر اسلام آباد یونائیٹد کے کپتان مصباح الحق نے تسلیم کیا کہ بیٹنگ لائن بڑا سکور کرنے میں ناکام رہی اور ایسا جلد وکٹیں گنوانے کی وجہ سے ہوا۔ پی ایس ایل لیگ میں آج دو میچز ہونگے، جہاں لاہور قلندرز اور کراچی کنگز کی ٹیمیں آمنے سامنے ہونگی، جبکہ دوسرے میچ میں اسلام آباد یونائیٹڈ اور پشاور زلمی کی ٹیمیں مدمقابل ہوں گی۔
