ایس ای سی پی کے شوکاز نوٹس اور ٹرمپ کی کارستانیوں کے بعدپاکستان اسٹاک ایکسچینج کا 100 انڈیکس گراوٹ کاشکار ہو گئی جس کے نتیجہ میں مارکیٹ کیپٹلائز یشن 178 ارب روپے کم ہوگئی۔
پاکستان اسٹاک ایکسچینج میں کاروبار کا آغاز ملے جلے رجحان سے ہوا، لیکن جلد ہی اس رجحان میں تبدیلی نظر آئی، ایس ای سی پی نے بیس سے زائد بروکرز کو شوکاز نوٹسز جاری کئے۔ نوٹسز کے اجراء کے بعد مارکیٹ میں غیریقینی صورتحال پیدا ہوئی اور انڈیکس میں ہزار پوائنٹس سے زیادہ کمی ہوئی جبکہ کاروبار کا اختتام 991 پوائنٹس کمی سے 48972 پر کیا۔ آج مجموعی طور پر 20 ارب روپے مالیت کے 38 کروڑ 97 لاکھ شیئرز کے سودے ہوئے۔ انسائٹ کیپیٹل کے معاشی تجزیہ نگار ذیشان افضل کے مطابق مارکیٹ کو کریکشن کی وجہ چاہیے تھی جو ایس ای سی پی کے شو کاز نوٹسز نے فراہم کردیا۔ اسکے علاوہ ڈونلڈ ٹرمپ کے اقدامات سےدنیا بھر کی مارکیٹوں میں منفی رجحان رہا جس کی جھلک پاکستانی مارکیٹ پر بھی نظر آئی۔
