Polling for the by-election in the constituency of the National Assembly NA-258 in Karachi

کراچی: قومی اسمبلی کی نشست این اے 258 میں ضمنی انتخاب کے لئے پولنگ کا عمل جاری ہے اور اس موقع پر سیکیورٹی کے بھی انتہائی سخت انتظامات کئے گئے ہیں۔

قومی اسمبلی کی نشست این اے 258 میں ضمنی انتخاب کے لئے پولنگ کا عمل صبح 8 بجے شروع ہو جو شام 5 بجے تک بلا تعطل جاری رہے گا۔ قومی اسمبلی کے اس حلقے میں صوبائی اسمبلی کی 2 نشستیں، 32 یونین کونسلز اور 5 یونین کمیٹیاں شامل ہیں، حلقے میں رجسٹرڈ 4 لاکھ 8 ہزار 613 ووٹرز کے لئے مجموعی طور پر 287 پولنگ اسٹیشنز میں سے کسی بھی پولنگ اسٹیشن کو نارمل قرار نہیں دیا گیا، 214 پولنگ اسٹیشنز حساس اور 73 انتہائی حساس قرار دیے گئے ہیں۔ پولنگ کے دوران سیکیورٹی کے لیے پولیس اور رینجرز کے 2 ہزار 748 اہلکار تعینات کیے گئے ہیں۔

پیپلز پارٹی کے عبدالحکیم بلوچ، جے یو آئی (ف) کے مولانا اکرم شاہ، سنی تحریک کے منور علی گبول اور جے یو آئی (س) کے شاہ ولی اللہ میدان میں ہیں جب کہ 8 امیدوار آزاد حیثیت میں حصہ لے رہے ہیں۔ ایم کیو ایم نے دھاندلی کے خدشات کا اظہار کرتے ہوئے انتخابی عمل کے بائیکاٹ کا اعلان کیا تھا جب کہ تحریک انصاف نے بھی حلقے میں سرکاری وسائل کے بے دریغ استعمال کے باعث انتخاب کے بائیکاٹ کا اعلان کر دیا، مسلم لیگ (ن) اس انتخاب میں حصہ ہی نہیں لے رہی۔

واضح رہے کہ 2013 کے عام انتخابات میں عبدالحکیم بلوچ نے مسلم لیگ (ن) کے ٹکٹ پر این اے 258 کی نشست جیتی تھی جب کہ پیپلز پارٹی دوسرے اور تحریک انصاف تیسرے نمبر پر تھی تاہم اس بار عبدالحکیم بلوچ اور تحریک انصاف کے امیدوارپیپلزپارٹی کی حمایت کر رہے ہیں۔