لاہور: پاکستان مسلم لیگ (ن) کی جانب سے کہا گیا ہے کہ وہ قومی اسمبلی کی نشست این اے-127 کے لیے مریم نواز کی جگہ متبادل امیدوار کا فیصلہ کریں گے۔
خیال رہے کہ مسلم لیگ (ن) لاہور کے صدر پرویز ملک کے صاحبزادے علی پرویز نے بھی اسے حلقے سے کاغذات نامزدگی جمع کرائے تھے، جنہیں ’ٹی وی‘ کا انتخابی نشان الاٹ کیا گیا تھا۔
اس لیے یہ امکان ظاہر کیا جارہا ہے کہ ممکنہ طور پر اب مریم نواز کی جگہ علی پرویز اس حلقے سے مسلم لیگ (ن) کے امیدوار ہوں گے۔ واضح رہے کہ احتساب عدالت کے 174 صفحات پر مشتمل تحریری فیصلے میں سابق وزیراعظم نواز شریف، ان کی صاحبزادی مریم نواز اور داماد کیپٹن (ر) صفدر کو 10 سال کے لیے عوامی عہدے کیلئے نااہل قرار دیا گیا تھا۔
پرویز ملک کا کہنا تھا کہ ’علی پرویز نے میرے متبادل امیدوارکے طور پر کاغذاتِ نامزدگی جمع کرائے تھے، اور اب مریم بی بی کے خلاف احتساب عدالت کا فیصلہ آنے کے بعد پارٹی فیصلہ کرے گی کہ ان کی جگہ این اے-127 اور پی پی- 173 سے اب متبادل امیدوار کون ہوگا‘۔اس حوالے سے پرویز ملک کا مزید کہنا تھا کہ اس حوالے سے چند روز میں فیصلہ کرلیا جائے گا۔
خیال رہے کہ پرویز ملک قومی اسمبلی کے حلقے این اے- 133 سے امیدوار ہیں جنہیں اپنا حلقہ این اے-127 اس وجہ سے چھوڑنا پڑا تھا کہ مریم نواز اپنے آبائی حلقے این اے-125 سے انتخابات میں حصہ لینے سے گریزاں تھیں اور انہوں نے این اے-127 سے کھڑے ہونے کا فیصلہ کیا تھا۔
ایون فیلڈ ریفرنس کا فیصلہ
خیال رہے کہ اسلام آباد کی احتساب عدالت نے شریف خاندان کے خلاف قومی احتساب بیورو (نیب) کی جانب سے دائر ایون فیلڈ ریفرنس کا فیصلہ سناتے ہوئے سابق وزیراعظم اور مسلم لیگ (ن) کے قائد نواز شریف کو 10 سال، ان کی صاحبزادی مریم نواز کو 7 سال اور داماد کیپٹن (ر) محمد صفدر کو ایک سال قید بامشقت کی سزا دی تھی۔
احتساب عدالت کے جج محمد بشیر نے ایوان فیلڈ کا ریفرنس کا فیصلہ سناتے ہوئے نواز شریف پر 80 لاکھ پاؤنڈ (ایک ارب 10 کروڑ روپے سے زائد) اور مریم نواز پر 20 لاکھ پاؤنڈ (30 کروڑ روپے سے زائد) جرمانہ بھی عائد کیا تھا۔
اس کے علاوہ احتساب عدالت نے شریف خاندان کے لندن میں قائم ایون فیلڈ پراپرٹی ضبط کرنے کا بھی حکم دیا تھا۔
