خواجہ آصف نے کہا کہ وزیراعظم خود کو احتساب کیلئے پیش کر چکے ہیں ، نوٹس جاری ہونے پر کوئی پریشانی نہیں ، جواب دینے کے لیے تیار ہیں
اسلام آباد: مسلم لیگ نواز کے رہنما خواجہ آصف کا کہنا ہے کہ نوٹس جاری ہونے پر کوئی پریشانی نہیں ، ہر فورم پر جواب دینے کے لیے تیار ہیں ، لیکن عمران خان بھی زکوۃٰ اور چندے کے پیسے کا جواب دیں ۔
خواجہ سعد رفیق کا کہنا تھا کہ دھرنے والے جواب دیں ، سپریم کورٹ آگئے ہیں تو اسلام آباد کیوں بند کر رہے ہیں ۔
سپریم کورٹ میں پاناما لیکس کی ابتدائی سماعت کے بعد خواجہ آصف اور خواجہ سعد رفیق بھی کمر بستہ نظر آئے اور میڈیا سے بات کی ۔ خواجہ آصف نے کہا کہ وزیراعظم خود کو احتساب کیلئے پیش کر چکے ہیں ، نوٹس جاری ہونے پر کوئی پریشانی نہیں ، جواب دینے کے لیے تیار ہیں ۔
انہوں نے اپنے روایتی انداز میں پنجابی میں کہا ” عمران خان جواب دیں زکوۃ کے نام پر جمع کیا گیا پیسہ کہاں گیا ۔
خواجہ سعدرفیق بھی اس موقع پر بولے اور کہا کہ بعض اپوزیشن رہنما صرف دھول اُڑا رہے ہیں عمران خان اداروں میں آگئے ہیں تو اب احترام کریں ۔ انہوں نے کہا کہ عمران خان کا ہر قدم خطرناک ہے، وہ چاہتےہیں وزیراعظم نہ بن سکے تو سب کچھ ختم ہو جائے گا ۔
