ممبئی : بالی ووڈ فلم ’’عشق زادے‘‘ کی اداکارہ پرینیتی چوپڑا جو فلاپ فلموں کے باعث کچھ عرصہ سے شوبزسے دورتھیں، ایک مرتبہ پھر اداکاری کی طرف واپس آگئی ہیں اور بالآخر انھیں طویل انتظار کے بعد اپنی پرفارمنس دکھانے کے لیے ایک فلم مل ہی گئی ہے۔
اطلاعات کے مطابق وہ شمت امینکی ہدایتکاری میں بنائی جانے والی فلم میں ارجن کپور کے ساتھ ہیروئن کا کردار نبھائیں گی۔ یش راج فلمز کے بینر تلے بنائی جانے والی فلم جس کا ابھی نام نہیں رکھا گیا ہے ’’عشق زادے‘‘ کے بعد ارجن کپور کے ساتھ پرینیتی کی دوسری فلم ہوگی۔
بتایاگیا ہے کہ شمت امین، شاہ رخ خان کی فلم ’’چک دے‘‘ اور رنبیر کپور کی ’’راکٹ سنگھ‘‘ کی ہدایات دے رہے ہیں، چھ برس بعد کسی فلم کی ہدایتکاری کریں گے جب کہ پرینتی چوپڑا جو مسلسل ناکامیوں کے باعث کچھ پریشان تھی اس فلم میں ایک نئے انداز میں نظر آئیں۔
دریں اثنا پرینیتی چوپڑا نے کہا ہے کہ اوپر تلے فلموں کی ناکامیوں سے کچھ عرصہ کے
لیے دلبرداشتہ ہوگئی تھی مگر اب لگ رہا ہے کہ بالی ووڈ میں کیریئر کو نئے سرے شروع کرنے کے لیے جس اچھی فلم کا انتظار تھا وہ ختم ہوگیا ہے اور جلد ہی یشراج فلمز جیسے بڑے بینرتلے بنائی جانے والی فلم میں کام کرنے جا رہی ہوں۔
ارجن کپور کے ساتھ کام کرنے کے سوال پر پرینیتی کا کہنا تھا کہ ارجن کپور کے ساتھ فلم ’’عشق زادے‘‘ میں کام کرچکی ہوں جو ایک کامیاب فلم تھی اور ہماری جوڑی کو سینما اسکرین پر بہت سراہا گیا تھا اب ایک مرتبہ میرے لیے پھر ارجن کے ساتھ کام کرنے کا موقع پید اہو گیا ہے مجھے امید ہے کہ عشق زادے کی طرح مداحوں کو اس مرتبہ بھی ہماری جوڑی پسند آئے گی۔
