Pakistan’s second weakest passports in the world

سویڈن: جرمنی کے باشندے دنیا کا سب سے طاقتور ترین پاسپورٹ رکھتے ہیں کیونکہ وہ ویزہ کے بغیر 158 ملکوں میں جاسکتے ہیں جب کہ دنیا کے کمزور ترین پاسپورٹس میں افغانستان سرِ فہرست ہے اور پاکستان کا دوسرا نمبر ہے کیونکہ سبز پاسپورٹ کی بنا پر صرف 27 ممالک کی سیر کی جاسکتی ہے۔

پاسپورٹ کے انڈیکس رینکنگ کی عالمی ویب سائٹ کے مطابق دنیا بھر میں پاسپورٹس کی اہمیت کو اسی بنیاد پر پرکھا جاتا ہے کہ اس کا حامل ویزہ کے بغیر کتنے ممالک کا دورہ کرسکتا ہے۔ یہ عمل اس ملک کے باشندے پر اعتماد کو ظاہر کرتا ہے۔ آرٹن کیپٹل پاسپورٹ انڈیکس کے مطابق جرمنی اس ضمن میں پہلے نمبر پر ہے جس کا حامل ویزا کے بغیر 158  ممالک میں جاسکتا ہے اور اسے پاسپورٹ کا ’’ویزہ فری اسکور‘‘ کا نام دیا گیا ہے۔

اس رینکنگ میں سویڈن دوسرے نمبر پر ہے جس کے پاسپورٹ کا ویزہ اسکور 157 ہے۔ افغانستان کا ویزہ پاسپورٹ اسکور 24 ہے یعنی اس کے حامل باشندے 24 ممالک میں بغیر ویزا جاسکتے ہیں۔ اس کے بعد پاکستان ہے جس کا ویزہ اسکور 27 ہے ۔ حیرت انگیز بات یہ ہےکہ کم ترین اہمیت کے پہلے 10 پاسپورٹس کا تعلق اسلامی ممالک سے ہے جن کی ترتیب یوں ہے اور ان کے سامنے ان کا ویزہ اسکور لکھا گیا ہے۔

1:  افغانستان 24

2: پاکستان 27

3: عراق 29

4: شام 31

5: صومالیہ 31

6: جنوبی سوڈان 36

7: ایتھیوپیا 36

8: سوڈان 36

9: بنگلا دیش 37

10: ایران 37

دوسری جانب دنیا میں طاقتور پاسپورٹس رکھنے والے ممالک میں جرمنی کے بعد سویڈن، فن لینڈ، فرانس، سوئزرلینڈ، اسپین،جنوبی کوریا اور برطانیہ شامل ہیں۔