counter easy hit

پاکستان کورونا پرقابو پانے کے بعد دنیا کو حفاظتی سامان برآمد کررہا ہے، نفیس ذکریا

اسلام آباد(یس اردو نیوز) کورونا وائرس کی وبا پر موثر کنٹرول کے لئے ذاتی تحفظ کے سامان کی برطانیہ اور عالمی مارکیٹ میں طلب کو پورا کرنے کے لئے پاکستان نے غیر ملکی منڈیوں میں بڑی کامیابی حاصل کی ہے، برطانیہ میں پاکستان ہائی کمشنر محمد نفیس ذکریا نے غیر ملکی وفد سے گفتگو کرتے ہوئے کہا ہے کہ عالمی وباءکو پاکستان کی طرح بہتر منیجمنٹ سے کنٹرول کیا جاسکتا ہے۔ اس موقع پر ہائی کمشنر نے وفد کے تمام ممبران کو فیس شیلڈز کا تحفہ بھی پیش کیا۔ ا س موقع پر مہمانوں کی لذیز پاکستانی آموں کے ساتھ تواضع بھی کی گئی۔انھوں نے کہا کہ پاکستان نے کورونا وائرس اور اس سے اموات پر موثر کنٹرول کے لئے بین الاقوامی معیار کے ذاتی تحفظ کے سامان و آلات (پی پی ای) کی عالمی مارکیٹ میں طلب ، خاص طور پر برطانیہ میں اس کی بڑھتی ہوئی مانگ کو پورا کرنے کے لئے غیر ملکی منڈیوں میں بڑی کامیابی حاصل کی ہے۔ جمعہ کو پاک امریکہ بزنس کونسل کے بانی چیئرمن افتخار علی ملک کو لندن سے موصول ایک پیغام کے مطابق پاکستان کے ہائی کمشنر محمد نفیس ذکریا نے ہائی کمیشن میں مڈلینڈز پارٹنرشپ این ایچ ایس فاونڈیشن ٹرسٹ کے چیف ایگزیکٹو نیل کار کی قیادت میں ایک اعلی سطحی وفد سے گفتگو کرتے ہوئے ان خیالات کا ظہار کیا۔ وفد کو بریفنگ دیتے ہوئے ہائی کمشنر نے کہا کہ اس ضمن میں پاکستان کا ترقی یافتہ ٹیکسٹائل سیکٹر بہت کارآمد رہا ہے۔ ملک میں اب برآمد کیلئے بین الاقوامی معیار کے این۔95 سمیت بہتر کوالٹی کے ماسک ، دستانے ، چشمے، فیس شیلڈ ، گاون ، جوتوں کے کور ، ہینڈ سینیٹائزر، کانٹیکٹ لیس تھرمامیٹر اور ہاسپٹل بیڈ شیٹس تیار کی جا رہی ہیں۔ ایکسپورٹ کوالٹی کے وینٹیلیٹر اور یورپی یونین کی سی ای سرٹیفائیڈ سپیل فیس شیلڈز سمیت پاکستانی مصنوعات برطانیہ میں ممکنہ خریداروں کے ساتھ شیئر کی گئی ہیں۔ نیل کار نے دو طرفہ تعاون کو فروغ دینے کی کوششوں پر ہائی کمشنر کا شکریہ ادا کیا اور ٹرسٹ اور پاکستان کے شعبہ صحت کے مابین بہتر و نتیجہ خیز ورکنگ ریلیشن شپ کی یقین دہانی کرائی۔ نیل کار نے دونوں ممالک کے باہمی مفاد میں مستقبل میں ادارہ جاتی سطح پر مہارتوں کی مزید شراکتداری کی امید کا اظہار کیا۔ پاک برطانیہ بزنس کونسل کے چیئرمین جولین ہیملٹن بارنس نے اس موقع پر اظہار خیال کرتے ہوئے کہا کہ پاکستان سے دنیا بھر خصوصا برطانیہ کو پی پی ای کیٹیگری کی برآمدات کی بہت زیادہ گنجائش موجود ہے۔ بانی چیئرمین پاک یو ایس بزنس کونسل افتخار علی ملک نے پاکستانی مصنوعات کو برطانیہ میں متعارف کرانے اور انہیں فروغ دینے پر ہائی کمشنر کی مخلصانہ کوششوں کو سراہا اور امید ظاہر کی کہ دونوں ممالک کے نجی شعبوں کے درمیان تعاون کے فروغ کی ان کوششوں کے مثبت نتائج برآمد ہوںگے اور پاکستانی برآمدات کے فروغ میں مدد ملے گی۔ قبل ازیں فریقین نے کورونا وائرس کی وبا سے پیدا شدہ صورتحال اور دونوں ممالک کے صحت کے شعبوں کے مابین تعاون کو فروغ دینے پر بھی تبادلہ خیال کیا۔ محمد نفیس ذکریا نے پاکستان کے شعبہ صحت کے ساتھ ٹرسٹ کے جاری تعاون خصوصاً میڈیکل کور کے ساتھ جاری تعاون کا خیرمقدم کرتے ہوئے کہا کہ عالمی چیلنج سے نمٹنے کے لئے قریبی تعاون وقت کی اشد ضرورت ہے۔

About MH Kazmi

Journalism is not something we are earning, it is the treasure that we have to save for our generations. Strong believer of constructive role of Journalism in future world. for comments and News yesurdu@gmail.com 03128594276

Connect

Follow on Twitter Connect on Facebook View all Posts Visit Website