اینڈروئیڈ اور ایپل آئی او ایس دونوں کے لیے نیا ایموجی کی بورڈ جاری کردیا گیا ہے جس میں مختلف جذبات اور احساسات کی ترجمانی کرنے کے لیے آئن اسٹائن کے کارٹونوں پر مبنی ایموجیز موجود ہیں۔
یہ ایموجی کی بورڈ ’’گرین لائٹ رائٹس‘‘ نامی کمپنی میں کاروباری امور کے نگراں اور البرٹ آئن اسٹائن کے مداح، انتھونی الیاکوسٹاس کا خیال ہے جسے انہوں نے آئن اسٹائن پر خاصی تحقیق کے بعد (اور ایموجیز بنانے والے مصور، آرتھر ساسی کی مدد سے) عملی جامہ پہنایا ہے۔ البرٹ آئن اسٹائن کے نام سے مختلف سوشل میڈیا اکاؤنٹس بھی ان ہی کی نگرانی میں چلائے جارہے ہیں۔
الیاکوسٹاس کا کہنا ہے کہ اس ایموجی کی بورڈ میں شامل مختلف ایموجیز بنانے میں آئن اسٹائن کی مشہور و نایاب دونوں طرح کی حقیقی تصاویر اور متعلقہ واقعات سے مدد لی گئی ہے۔ مثلاً زبان نکالنے والی مشہور تصویر میں آئن اسٹائن خوشگوار موڈ میں تھا جسے ایموجی کے طور پر خوشی کے اظہار کا ترجمان بنایا گیا ہے۔ لیکن ایک غیرمعروف تصویر میں وہ اپنے پالتو کتے ’’چیکو‘‘ کے ساتھ تھا جس کا ایموجی فراغت یا وقت گزاری کا اظہار کرتا ہے۔ ایسی ہی ایک اور تصویر میں آئن اسٹائن سمندر کے کنارے ایک پتھر پر اکیلا بیٹھا ہوا ہے اور اس ایموجی کو سیر و سیاحت یا تفریح کا ہم معنی رکھا گیا ہے۔
البتہ ’’آئن اسٹائن موجی‘‘ نامی اس ایموجی کی بورڈ میں کچھ غیر حقیقی ایموجیز بھی ہیں جیسے کہ ایک ایموجی میں آئن اسٹائن کو سپرمین جیسے لباس میں دکھایا گیا ہے کیونکہ الیاکوسٹاس کے نزدیک آئن اسٹائن جدید سائنس کا سپر ہیرو تھا۔ اس طرز کے ایک اور ایموجی میں آئن اسٹائن کو کششِ ثقل کی لہروں پر سوار دکھایا گیا ہے کیونکہ نظریہ اضافیت میں اس نے ثقلی لہروں کی پیش گوئی کی تھی جنہیں 100 سال بعد 2016 میں دریافت کیا گیا۔ ایک اور تصوراتی ایموجی میں آئن اسٹائن نے شب خوابی کا لباس اور گلابی چپلیں پہنی ہوئی ہیں یعنی اس کا مطلب ’’شب بخیر‘‘ ہے۔
آئن اسٹائن کے لیے پورا ایموجی کی بورڈ مخصوص کرنا ایک اچھا خیال ہے کیونکہ جدید سائنسی تاریخ میں آئن اسٹائن کو سب سے زیادہ شہرت حاصل ہے جب کہ بیسویں صدی کے اختتام پر ہونے والے تمام عالمی جائزوں میں آئن اسٹائن کو اس صدی کی مشہور ترین شخصیت بھی قرار دیا گیا تھا
