لاہور: اداکارہ و ماڈل صائمہ اظہر نے کہا ہے کہ اداکاری کیلیے خود کو صرف فلموں تک محدود نہیں رکھنا چاہتی، ٹی وی ڈراموں میں جب کوئی اچھا کردار آفر ہوگا تو میں ضرور کام کروں گی۔
بات چیت کرتے ہوئے صائمہ اظہر نے کہا کہ ایک وقت تھا جب خوبصورت پیراہن، قیمتی جیولری اور لانگ ہیل کے ساتھ ریمپ پر واک کرتے ہوئے ڈر لگتا تھا اور اس کیلیے بہت تیاری کی جاتی تھی۔ پھر ٹی وی کمرشل کا دور شروع ہوا اور یہ مرحلہ بھی خاصا مشکل تھا لیکن کڑی محنت اور آگے بڑھنے کے جذبے نے ان تمام مشکلات سے بچایا اور آج میں فلم میں مرکزی کردار ادا کررہی ہوں۔
اداکارہ نے کہا کہ یہ کام بھی اپنی مثال آپ ہی ہے کیونکہ جب تک اس شعبے میں نہیں آئے تھے تویوں محسوس ہوتا تھا کہ یہ سب بہت آسان ہے اور اس کام کو کرنے کیلیے کچھ خاص جتن کرنے کی ضرورت نہیں ہے مگر اس کام کو کرنے کے بعد پتہ چل رہا ہے کہ یہ بہت مشکل اور باریک کام ہے۔ یہ دور سے جتنا آسان دکھائی دیتا ہے، اتنا ہی چیلنجنگ ہے۔
صائمہ اظہر نے کہا کہ ایک کردار کو نبھانا اور اس کو اپنے اوپر طاری کرنا ہر کسی کے بس کی بات نہیں۔ اس لیے اب مجھے اپنے کردار میں حقیقت کا رنگ بھرنے کیلیے کڑی محنت کرنا پڑ رہی ہے۔ بڑی اسکرین پر اچھا دِکھنے کے ساتھ ساتھ مجھے اپنی فنکارانہ صلاحیتوں کا بہترین اظہار بھی ضروری ہے۔
ایک سوال کے جواب میں صائمہ اظہر نے کہا کہ ایکٹنگ کیلیے خود کو صرف فلموں تک محدود نہیں رکھنا چاہتی۔ ٹی وی ڈراموں میں جب کوئی اچھا کردارآفرہوگا تو میں ضرور کام کروں گی، البتہ پڑوسی ملک بھارت میں کام کرنے کے حوالے سے بہت سوچ وچار کے بعد ہی کوئی فیصلہ لوں گی کیونکہ میں بخوبی جانتی ہوں کہ بالی ووڈ میں پاکستانی اداکاراؤں کو جو کردار دیے جاتے ہیں وہ ایک طرف تو جاندار نہیں ہوتے اور پھر نئے ہیرو کے ساتھ متعارف کروایا جاتا ہے جو میرے نزدیک بہت بڑی ناانصافی ہے۔
