اسلام آباد (جیوڈیسک) تحریک انصاف کے چیئرمین عمران خان نے کہا ہے کہ اگر بیرون ملک رقم محفوظ ہو تو نواز شریف اور زرداری بنا کسی نظریے کے ہر جنگ میں کود سکتے ہیں۔
ن لیگ اور پیپلزپارٹی کے کارکن اپنے رہنمائوں سے اربوں روپے کے اثاثوں کے بارے میں سوال کریں۔ منگل کو اپنے ٹویٹر پیغام میں انھوں نے وزیراعظم نواز شریف اور سابق صدر آصف زرداری کو تنقید کا نشانہ بناتے ہوئے کہا کہ منزل کا پتہ نہ ہو تو سب راستے ایک جیسے ہوتے ہیں۔
نواز شریف اور زرداری کے بیرون ملک اثاثے محفوظ ہوں تو کسی بھی جنگ میں کودنے کیلئے تیار ہوجائیں گے، انھیں پاکستانیوں کے نقصان یا فائدے سے کوئی سروکار نہیں، نواز شریف اور زرداری کے پاس کوئی نظریہ نہیں، دونوں پیسہ بنانے کیلیے سیاست کرتے ہیں۔
