اسلام آباد: (دنیا نیوز) پی اے سی کے اجلاس میں آڈٹ حکام نے انکشاف کیا کہ نیب ہیڈکوارٹرز بلڈنگ میں ہیٹنگ، وینٹیلیشن اور ائیرکنڈیشنگ کا ٹھیکہ چھ کروڑ روپے اضافی رقم میں دیا گیا۔ 23 کروڑ 57 لاکھ سے زائد کا منصوبے بعد میں تخمینہ 29 کروڑ 45 لاکھ لگایا گیا۔

پبلک اکاؤنٹس کمیٹی کا اجلاس سید خورشید شاہ کی صدارت میں اسلام آباد میں ہوا۔ اجلاس میں آڈٹ حکام نے انکشاف کیا کہ نیب ہیڈکوارٹر بلڈنگ میں ہیٹنگ، وینٹیلیشن اورائیرکنڈیشنگ کا 6 کروڑ روپے کے اضافی رقم کا ٹھیکہ دیا گیا۔ یہ منصوبہ 23 کروڑ 57 لاکھ سے زائد کا منصوبہ تھا مگر بعد میں اس کا 29 کروڑ 45 لاکھ کا تخمینہ لگایا گیا۔ کنٹریکٹ کی رقم میں 24.98 فیصد کا اضافہ ہوا۔ کمیٹی نے سیکرٹری وزارت ہاؤسنگ کو معاملے میں ذمہ داروں کا تعین کرنے کی ہدایت کردی ہے۔

کمیٹی نے ریٹائرڈ افسران کی ہاؤسنگ سکیم میں تاخیر اور ان سے 15 لاکھ جرمانے کے نوٹس پر برہمی کا اظہار کرتے ہوئے کہا کہ کل کو آپ نے بھی ریٹائرڈ ہونا ہے، اس طرح زیادتی نہ کریں۔وزارت حکام نے کمیٹی کو بتایا کہ اس پر 60 فیصد کام مکمل ہوچکا ہے۔ کمیٹی نے معاملے پر ڈاکٹر عارف علوی کی سربراہی میں کمیٹی بنادی ہے جو موقعہ پر ہاؤسنگ سکیم کا دورہ کریگی، کمیٹی نے تمام تفصیلات بھی طلب کرلی ہیں۔