لاہور (نیوز ڈیسک ) یہ وہ منافق ہیں جو نواز شریف کی گرفتاری کے وقت ہمیں ائیرپورٹ لے جانے کی بجائے نہر کے موڑ پر لے گئے، مولانا فضل الرحمان کے مارچ میں شرکت سے انکار کرنے پر مریم نواز کے سوشل میڈیا سیل نے شہباز شریف کیخلاف مہم کا آغاز کردیا۔ تفصیلات کے مطابق معروف صحافی و اینکر پرسن صابر شاکر نے نجی ٹی وی چینل کے پروگرام سے گفتگو کرتے ہوئے بتایا ہے کہ مریم نواز کے سوشل میڈیا سیل نے پارٹی کے صدر شہباز شریف کیخلاف باقاعدہ مہم کا آغاز کر دیا ہے۔شہباز شریف نے گزشتہ روز نواز شریف سے ملاقات کے دوران انہیں قائل کرنے کی کوشش کی تھی کہ مولانا فضل الرحمان کے اسلام آباد مارچ میں شرکت نہ کی جائے، تاہم نواز شریف نے یہ مشورہ ماننے سے انکار کر دیا تھا۔نواز شریف نے شہباز شریف کو ہدایت کی تھی کہ مولانا فضل الرحمان کے اسلام آباد مارچ کی بھرپور حمایت اور مدد کی جائے۔ تاہم شہباز شریف نے مولانا فضل الرحمان کے دھرنے میں شرکت کرنے سے انکار کر دیا تھا۔شہباز شریف نے موقف اختیار کیا کہ ان کی صحت اجازت نہیں دیتی، اس لیے وہ جے یو آئی ف کے دھرنے میں شریک نہیں ہوں گے۔ اب صابر شاکر کہتے ہیں کہ مریم نواز اس تمام صورتحال میں شہباز شریف سے شدید نالاں ہیں۔ مریم نواز کے سوشل میڈیا سیل کی جانب سے شہباز شریف کو شدید تنقید کا نشانہ بنایا جا رہا ہے۔ یہاں تک کہا جا رہا ہے کہ ان لوگوں نے مسلم لیگ ن کو تقسیم کرکے اپنی منافق لیگ بنا لی ہے۔ جبکہ یہ الزام بھی عائد کیا جا رہا ہے کہ شہباز شریف گزشتہ برس نواز شریف کی گرفتاری کے وقت جان بوجھ کر ائیرپورٹ نہیں پہنچے تھے۔ شہباز شریف مسلم لیگ ن کی ریلی کو ائیرپورٹ لے کر جانے کی بجائے نہر پر ہی ٹھہرے رہے، اور پھر بعد ازاں وہیں اس ریلی کو ختم کر دیا۔
