کراچی: کراچی میں گرمی کی شدت برقرار ہے، آج بھی درجہ حرارت 41 سے 43 ڈگری تک پہنچنے کا امکان ہے، محکمہ موسمیات کے مطابق ہوا میں نمی کا تناسب 20 فیصد ہے شہریوں بلا ضرورت گھر سے باہر نہ نکلیں۔
شہر قائد میں گزشتہ روز بھی سورج آگ برساتا رہا اور درجۂ حرارت 43.3 سینٹی گریڈ ریکارڈہوا، جب کہ اندرون سندھ کے شہروں میں بھی شدید گرمی رہی۔ سمندری ہوائیں تیسرے روز بھی بند ہونے کے باعث شہریوں نے گرم ہواؤں اور چلچلاتی دھوپ کا سامنا کیا۔
دوپہر 2 بجے کراچی کا درجۂ حرارت 42 سینٹی گریڈ سے تجاوز کر گیا، جب کہ گرمی کی شدت (ہیٹ انڈیکس) 44 درجہ محسوس کی گئی اور ہوا میں نمی کا تناسب 4 فیصد ریکارڈ کیا گیا۔ دن بھر شمال کی جانب سے ہلکی رفتار سے گرم ہوائیں چلتی رہیں، تاہم شام کو سمندری ہوائیں چلنا شروع ہوئیں تو گرمی کی شدت میں کچھ کمی آ گئی۔
محکمہ موسمیات کا کہنا ہے کہ ہیٹ ویو کا سلسلہ جمعرات تک برقرار رہے گا۔ شہر میں جاری شدید گرمی کے باعث سندھ مدرسہ یونیورسٹی میں آج ہونے والے امتحانات مؤخر کر دیئے گئے ہیں۔ ایس ایم آئی یو میں 22 سے 24 مئی تک ہونے والے امتحانات کی تاریخ کا اعلان بعد میں کیا جائے گا۔ رجسٹرار سندھ مدرسہ یونیورسٹی کے مطابق 25 مئی اور اس کے بعد کے امتحانات مقررہ وقت پر منعقد ہوں گے۔
