اسلام آباد (ویب ڈیسک ) وزیر اعظم کے معاون خصوصی ندیم افضل چن کا کہنا ہے عرفان صدیقی کے ساتھ جو واقعہ پیش آیا ہے ، ایسے واقعات حکومتوں کے خلاف سازش ہوتے ہیں۔ جیونیوز کے پروگرام ”کیپٹل ٹاک“میں گفتگو کرتے ہوئے ندیم افضل چن نے کہا عرفان صدیقی کے ساتھ جو واقعہ پیش آیا ہے ، ایسے واقعات حکومتوں کے خلاف سازش ہوتے ہیں ۔ عرفان صدیقی کی گرفتاری پر جس طرح آواز بلند کی گئی ہے ، اس سے لگتا ہے کہ ہم اظہار رائے کی آزادی کی طرف جا رہے ہیں۔ انہوں نے کہا کہ عرفان صدیقی کی گرفتاری پر تمام سیاسی پارٹیوں نے مذمت کی ہے اور ان کی رہائی کی تعریف کی ہے ۔ انہوں نے کہا کہ عرفان صدیقی کے معاملے پر انکوائری ہونی چاہئے اور ہورہی ہوگی کیونکہ وزیر اعظم عمران خان نے اس معاملہ پر خود افسوس کا اظہار کیا ہے ۔ ندیم افضل چن نے کہا کہ اگر اپوزیشن دھرنا دینا چاہے تو ان پرشیلنگ نہیں ہوگی اور پرچے بھی درج نہیں ہوں گے۔ دوسری جانب ایک خبر کے مطابق سابق وزیر اعظم نواز شریف کے دور حکومت میں معاون خصوصی برائے قومی امور رہنے والے عرفان صدیقی کو جمعے کی رات اسلام آباد سے کرایہ داری ایکٹ کی خلاف ورزی پر گرفتار کیا گیا تھاجنہیں مقامی مجسٹریٹ نے 14 روزہ جوڈیشل ریمانڈ پر اڈیالہ جیل بھیج دیا تھامگر بعدازاں انہیں رہا کردیا گیا تھا۔ عرفان صدیقی کی گرفتاری اور خاص طور پر انہیں ہتھکڑی لگا کر عدالت میں پیش کرنے پر جیسے بھونچال آ گیا۔ اس پر اپوزیشن،حکومتی ارکان، سول سوسائٹی اور صحافیوں نے بھی بھرپور آواز اٹھائی۔اسی احتجاج کے پیش نظر شاید انہیں فوری طور پر رہا بھی کر دیا گیا تھا۔ تاہم رہا ہونے کے بعد عرفان صدیقی نے اس وقوعے سے متعلق بات کرتے ہوئے کہا کہ مجھے نہیں معلوم کہ اتوار کو میری رہائی کس کے کہنے پر ہوئی، یہ گھر 4 دن پہلے کرائے پر دیا گیا تھا، مجھے عدالت میں اس حالت میں پیش کرکے دنیا کو کیا پیغام دیا گیا
