Khurshid Shah

سکھر (جیوڈیسک) قومی اسمبلی میں قائد حزب اختلاف اور پیپلز پارٹی کے سینئر رہنما سید خورشید شاہ نے کہا ہے کہ ہارس ٹریڈنگ کے خلاف آستینیں چڑھا کر بات کرنے والے تحریک انصاف کے چیرمین عمران خان بتائیں کہ سینیٹ انتخابات میں ڈپٹی چیرمین کے لئے حصہ لینے والے ان کے امیدوار کو 7 کی جگہ 16 ووٹ کیسے ملے۔

سکھر میں میڈیا کے نمائندوں سے بات کرتے ہوئے سید خورشید شاہ نے کہا کہ عمران خان آستینیں چڑھا کر ہارس ٹریڈنگ کے خلاف بات کرتے ہیں لیکن ڈپٹی چیرمین سینیٹ کے انتخاب میں تحریک انصاف کے امیدوار کو 7 کی جگہ 16 ووٹ ملے لہٰذا وہ بتائیں کہ یہ ہارس ٹریڈنگ نہیں تو اور کیا ہے۔

ایم کیو ایم کے مرکز نائن زیرو پر رینجرز کی کارروائی کے حوالے سے انہوں نے کہا کہ متحدہ کے قائد الطاف حسین خود وضاحت کرچکے ہیں کہ مطلوب افراد کو وہاں رہنے کی کیا ضرورت تھی جب کہ پیپلز پارٹی چار دیواری کا تقدس پامال کئے جانے پر سینیٹ کے اجلاس میں ایم کیو ایم کے ساتھ احتجاج میں شامل ہوئی۔

خورشید شاہ کا کہنا تھا کہ دہشت گردوں سے مذاکرات نہیں کئے جاسکتے کیونکہ اگر ان سے مذاکرات کریں گے تو وہ اور طاقتور ہوں گےجب کہ ان کا کہنا تھا کہ ذوالفقار علی بھٹو کو ضیا الحق اور بےنظیر بھٹو کو پرویز مشرف کی دہشت گردی نے قتل کیا۔