Farooq Sattar

کراچی (جیوڈیسک) ایم کیو ایم کے رہنماء ڈاکٹر فاروق ستار نے کہا ہے کہ عمران خان کی جناح گرائونڈ آمد پر کوئی ناخوشگوار واقعہ پیش نہیں آیا۔ ایم کیو ایم کے رہنمائوں کی جانب سے عمران خان کو خوش آمدید کہا گیا تھا۔ ایم کیو ایم کے رہنماء خود عمران خان کا گاڑی تک استقبال کرنے گئے تھے۔ معلوم نہیں عمران خان یادگار شہداء تک کیوں نہیں آئے اور واپس چلے گئے۔

فاروق ستار نے کہا کہ ایم کیو ایم کے قائد الطاف حسین کی ہدایت پر مہمانوں کے استقبال کی تیاریاں کل سے شروع تھیں۔ نائن زیرو پر مہمانوں کیلئے پرتکلف ظہرانے کے ساتھ ساتھ مہمانوں کے لئے تحفوں کا بھی بندوبست کیا گیا تھا۔ عمران خان نے یادگار شہداء سے اپنی انتخابی مہم کا آغاز کیا جس پر ہم ان کے بہت ممنون اور شکر گزار ہیں۔

انہوں نے کہا کہ عمران خان کی واپسی کے بعد بہت چھوٹے پیمانے پر لڑائی کا واقعہ پیش آیا تھا لیکن پی ٹی آئی کے کچھ رہنمائوں نے ایسے بیانات جاری کئے جس سے یہ تاثر ملتا ہے کہ ایم کیو ایم کے قائد الطاف حسین یا ان کے رہنمائوں کی نیت میں کچھ اور تھا۔ انہوں نے مطالبہ کیا کہ الطاف حسین کی جانب سے جذبہ خیر سگالی بے مثال ہے۔ جو عناصر خوش نہیں ہمیں ان پر نظر رکھنا ہوگی۔ ہم چاہتے ہیں کہ کراچی میں امن کی فضاء قائم رہے۔