اسلام آباد (ویب ڈیسک) امریکی صدر ڈونلڈ ٹرمپ نے 10سالہ پاکستانی نزاد امریکی لڑکی کو ہیرو قرار دیدیا۔اتوار کو امریکی سفارتخانہ اسلام آباد کی جانب سے جاری ایک ٹویٹ کے مطابق امریکی صدر نے کورونا وائرس کے ہیروز کے اعزاز میں منعقدہ تقریب کے دوران 10 سالہ پاکستانی نژاد امریکی لڑکی لیلیٰ خان کو ہیرو تسلیم کرتے ہوئے مبارکباد دی۔ لیلیٰ نے مقامی طبی کارکنوں اور فائر فائٹرز کو 100 کوکیز کے باکس پیش کئے تھے۔جبکہ دوسری جانب ایک خبر کے مطابق امریکی صدر ڈونلڈ ٹرمپ نے کووڈ-19 ویکسین تلاش کرنے کے لیے بنائے گئے ایک فاسٹ ٹریک پروگرام کی سربراہی کے لیے ایک امریکی مسلمان منصف محمد سلاوی کا انتخاب کرلیا۔ رپورٹ کے مطابق صدر ٹرمپ نے وائٹ ہاؤس میں ایک نیوز بریفنگ میں اعلان کیا کہ ‘آپریشن وارپاسپیڈ کے چیف سائنس دان ڈاکٹر منصف محمد سلاوی ہوں گے جو عالمی سطح پر مشہور امیونولوجسٹ ہیں اور انہوں نے 14 نئی ویکسین بنانے میں مدد کی تھی’۔ انہوں نے کہا کہ ‘نجی شعبے میں ان کے وقت کے دوران 10 برسوں میں یہ ہمارے لیے بہت ساری نئی ویکسینز ہیں‘۔ صدر ٹرمپ نے کہا کہ مراکشی امریکی امیونولوجسٹ ’ویکسین تیار کرنے کے سلسلے میں دنیا کے سب سے معزز افراد میں سے ایک ہیں‘۔ ڈاکٹر منصف محمد سلاوی مراکش کے شہر اگادیر میں 1959 میں پیدا ہوئے، وہ معروف دوا ساز کمپنی گلیکسو اسمتھ کلائن کے شعبہ ویکسین کے سربراہ رہے اور 30 سال تک اس کمپنی میں کام کیا۔ خیال رہے کہ ان کی بہن کا بہت چھوٹی عمر میں کھانسی کی وجہ سے انتقال ہوگیا تھا۔ کاسا بلانکا کے محمد پنجم ہائی اسکول سے فارغ التحصیل ہونے کے بعد ڈاکٹر منصف محمد سلاوی نے بیلجیئم میں حیاتیات کی تعلیم حاصل کی اور ہارورڈ میڈیکل اسکول اور ٹفٹس یونیورسٹی اسکول آف میڈیسن سے پوسٹ گریجویٹ کورس مکمل کیا۔ انہوں نے 100 سے زائد سائنسی مقالے شائع کیے ہیں اور وہ انٹرنیشنل ایڈز ویکسین انیشی ایٹو کے بورڈ آف ڈائریکٹرز کے رکن بھی ہیں۔ ڈاکٹر منصف محمد سلاوی نے وائٹ ہاؤس بریفنگ میں پروگرام متعارف کراتے ہوئے کہا کہ ‘میں نے حال ہی میں ایک کورونا وائرس ویکسین کے کلینیکل ٹرائل کا ابتدائی ڈیٹا دیکھا ہے‘۔ ان کا کہنا تھا کہ ’اس ڈیٹا نے مجھے مزید اعتماد دیا ہے کہ ہم 2020 کے آخر تک ویکسین کی کروڑوں خوراک بنالیں گے‘۔