کھاریاں (نیئر صدیقی سے) پاکستان پیپلز پارٹی شہید بھٹوگروپ ضلع گجرات کے آرگنائزر حاجی محمد شریف نے کہا ہے کہ شہید ذوالفقار علی بھٹونے عوام کے معیار زندگی کو بلند کرنے کیلئے جو خواب دیکھا تھا وہ ابھی تشنہ تکمیل ہے۔ پیپلز پارٹی کے نام پر بھٹو کے دیوانوں کو بے وقوف بنانے والوں اور پیپلزپارٹی پر شب خون مارنے والوں کی حقیقت عوام پر کھل چکی ہے ۔پی پی کے نظریاتی کارکن محترمہ غنویٰ بھٹو اور ذوالفقار بھٹو جونیئر کی طرف امید بھری نظروں سے دیکھ رہے ہیں۔ ان خیالات کا اظہار انہوں نے پاکستان پیپلز پارٹی شہید بھٹوآزادکشمیر کے ایک وفد سے ملاقات کرتے ہوئے کیا۔وفد کی قیادت پی پی پی شہید بھٹو گروپ برطانیہ کے آرگنائزر سید سکندر جاوید بخاری اورمیرپور آزاد کشمیر کے آرگنائزر نصیر احمد جرال کر رہے تھے۔ حاجی محمد شریف نے کہا کہ پی پی پی شہید بھٹو کی تنظیم نو کا کام تیزی سے جاری ہے نہ صرف پاکستان بلکہ دیگر ممالک میں بھی پارٹی کی تنظیم سازی کی جا رہی ہے۔ اور وہ دن دور نہیں جب بھٹو کے ادھورے خوابوں کو ذوالفقار بھٹو جونیئر کی قیادت میں تعبیر نصیب ہو گی۔ انہوں نے کہا کہ گذشتہ دنوں ڈنگہ میں ہونے والے محترمہ غنویٰ بھٹو کے کامیاب کنونشن نے پارٹی کو ہائی جیک کرنے والوں کی آنکھیں کھول کر رکھ دی ہیں
