لاہور(ویب ڈیسک) معروف میزبان جگن کاظم نے پی ٹی وی چھوڑ کر نجی چینل جوائن کرلیا ہے۔جگن کاظم کئی سال سے پی ٹی وی لاہور مرکز سے نشر ہونے والے مارننگ شو کی میزبانی کررہی تھیں جس دوران انہیں کئی پرائیویٹ چینلز سے کام کی پیشکش بھی ہوتی رہی تاہم انہوں نے پی ٹی وی چھوڑنے سے انکار کردیا تھا۔ جگن کاظم نے چینل سے رمضان ٹرانسمیشن بھی کی تھی اور اسی دوران یہ افواہیں بھی زیر گردش تھیں وہ جلد ہی پی ٹی وی چھوڑ دیں گی اور آخر کار انہوں نے یہ فیصلہ کرہی لیا۔ جگن کاظم نے نئے چینل پر اپنا پہلا پروگرام پیش کیا۔یاد رہے کہ جگن کاظم نے ٹی وی ڈراموں اور ماڈلنگ دونوں میں بے پناہ شہرت کمائی ہے ان کا شمار ان فنکاروں میں کیا جاتا ہے۔ جن کو اپنے کام پر مکمل دسترس حاصل ہے۔ ایک اور رپورٹ کے مطابق ماڈل واداکارہ ژالے سرحدی نے کچھ عرصہ قبل انکشاف کیا تھا کہ وہ بالی ووڈ اداکارہ پریانکا چوپڑا کا ڈپلیکیٹ کردار ادا کرچکی ہیں۔ ایک انٹرویو میں ژالے کا کہنا تھا کہ انہوں نے اس زمانے میں کام شروع کیا جب پاکستان میں ہندوستانی چینلز پر پابندی لگائی گئی تھی اور اسی عرصے میں پریانکامس ورلڈ بنی تھیں۔ انھوں نے بتایا کہ اس وقت وہ ایک شو کررہی تھیں، لوگ سمجھے کہ وہ پریانکا ہیں۔ ژالے اس وقت ایک ہندوستانی اداکارکے ساتھ کام کررہی تھی، جس نے ان کی تصاویر اپنے دوستوں اور ایجنٹ کو بھیج دیں، جس کے بعد ہندوستان سے رابطہ کیا گیا کہ وہ پریانکا کا ڈپلیکٹ کردار ادا کریں۔ ژالے اس بات پر شرط بھی لگاتی ہیں کہ ڈپلیکیٹ کردار کی وجہ سے اب تک پریانکا انہیں پہچان گئی ہونگی۔ ژالے خود کو اگر پریانکا کی ہمشکل قرار دے کر لائم لائٹ میں رہنا چاہتی تھیں تو یہ اور بات ہے لیکن قدرت کی طرف سے عطا کردہ بے پناہ صلاحیتوں کی بدولت وہ پریانکا کو بھی پیچھے چھوڑ سکتی ہیں۔
