شہباز شریف کی رہائی ناممکن ۔۔۔ نیب نے بالآخر حتمی کارروائی کا اعلان کر دیا

لاہور(ویب ڈیسک) آشیانہ اقبال اسکینڈل میں شہباز شریف کی مشکلات میں مزید اضافہ ہونے والا ہے ۔ تازہ ترین تفصیلات کے مطابق نیب کی جانب سےشہبازشریف کےخلاف ریفرنس تیار کر لیا گیا۔ شہبازشریف سمیت 4افرادکےخلاف ریفرنس24 نومبرکوفائل کئے جانے کاامکان ہے۔ نیب لاہورکی ٹیم نےریفرنس سےمتعلق چیئرمین نیب کوبریفنگ دیدی۔
نیب کی جانب سے الزام عائد کیا گیا ہے کہ شہبازشریف نےاختیارات کاغلط استعمال کیا ہے۔ جبکہ دوسری جانب قومی احتساب بیورو نے بینکوں و مالیاتی اداروں سے سابق وزیر اعلی میاں شہباز شریف سمیت پانچ لوگوں کے بینک اکاونٹس کی تفصیلات مانگ لی ہیں۔ایکسپریس نیوزکے مطابق قومی احتساب بیورو نے بینکوں و مالیاتی اداروں سے سابق وزیرِ اعلٰی پنجاب شہباز شریف سمیت 5 افراد کے بینک اکاونٹس کی تفصیلات مانگی ہیں، نیب نے حمزہ شہباز شریف،سلمان شہباز شریف ،عمران علی یوسف اور فہیم اختر چوہدری کے بینک اکاونٹس کی تفصیلات بھی مانگی گئی ہیں۔ نیب کا کہنا ہے کہ معلومات فراہم نہ کرنے والے ذمہ دار افسر کے خلاف کاروائی ہوگی۔نیب کی جانب سے بینکوں اور مالیاتی اداروں کو بھیجے گئے مراسلے میں کہا گیا ہے کہ شہباز شریف،حمزہ شہباز، سلمان شہباز ، عمران علی یوسف اور فہیم اختر چوہدری کے بینک اکاونٹس، اکاونٹ کھولنے کا فارم، کمپیوٹرائزڈ قومی شناختی کارڈ کی کاپی، دستخطی کارڈ کا نمونہ، اکاونٹ کھولنے کی تاریخ سے لے کر اب تک کے اکاؤنٹس کی اسٹیٹمنٹس بھی 26 نومبر تک ہیڈ آفس کو بھجوائی جائیں۔نیب نے محکمہ قومی بچت سے شہباز شریف، حمزہ شہباز، سلمان شہباز، عمران علی یوسف اور فہیم اختر چوہدری کے حوالے سے ملکی و غیر ملکی کرنسی میں بچت اسکیموں میں سرمایہ کاری و سرٹیفکیٹس کی تفصیلات بھی مانگی ہیں۔دوسری جانب نیب کو معلومات فراہم کرنے کیلئے بینکوں و مالیاتی اداروں نے تمام فیلڈ فارمشنز سے رپورٹ مانگ لی ہے۔