کراچی: چھرا مار ملزم کے خوف سے موٹر سائیکل کی ٹکر سے زخمی ہونیوالی خاتون نے دوڑ لگا دی۔

حیدری تھانے کی حدود ضیاالدین اسپتال کے قریب ایک موٹر سائیکل سوار 40 سالہ شنیلا سے ٹکرا کر فرار ہو گیا تاہم خاتون یہ سمجھی کہ چھرا مار ملزم نے اس پر حملہ کیا ہے اور وہ خوفزدہ ہو کر بھاگتی ہوئی بنگلے میں داخل ہوگئی، خاتون کی کمر سے خون نکلتا دیکھ کر بنگلے کے مالک صابر شاہ نے اسے نجی اسپتال پہنچایا اور ون فائیو پر اطلاع دی جس کے بعد چھرا مار کو پکڑنے کے لیے پولیس کی دوڑیں لگ گئی۔

ایس ایچ او حیدری ذوالفقار حیدر نے بتایا کہ گھریلو ملازمہ چھری کے وار سے نہیں بلکہ موٹر سائیکل کا ہینڈل لگنے سے زخمی ہوئی تھی جسے ڈاکٹروں نے مرہم پٹی کے بعد گھر بھیج دیا، بنگلے کے مالک صابر شاہ نے بتایاکہ گھریلو ملازمہ بھاگتی ہوئی گھر میں آئی تو اس کا خون بہہ رہا تھا ہم سمجھے کہ چھرا مار نے زخمی کیا ہے تاہم بعد میں پتہ چلا کہ وہ موٹر سائیکل کا ہینڈل لگنے سے زخمی ہوئی ہے۔