لندن (ویب ڈیسک ) پاکستان کی معروف پاپ سنگر نازیہ حسن مرحومہ کے شوہر مرزا اشتیاق بیگ نے کہا ہے میں نے نازیہ حسن کو طلاق نہیں دی تھی میرے اور ان کے حوالے سے بہت سی غلط فہمیاں پھیلائی گئی تھیں۔ نازیہ حسن کی سالگرہ کے موقع پر خصوصی انٹرویو میں انہوں نے کہا کہ یہ کہنا درست نہیں کہ نازیہ کی موت سے دس روز پہلے طلاق ہوگئی تھی۔انہوں نے کہا کہ میری اور نازیہ حسن کی محبت کی شادی تھی۔ نازیہ میری بہن آفرین بیگ کی دوست تھیں۔ ہم ایک دوسرے کو دل و جان سے پسند کرتے تھے۔ انتقال سے پہلے نازیہ پہلی بار کینسر میں مبتلا نہیں ہوئیں تھیں، اس سے قبل بھی ان کو 1992میں اوورین کینسر ہو چکا تھا جس میں ان کے جسم سے ایک بیضہ دانی نکال دی گئی تھی۔ ان دنوں نازیہ اقوام متحدہ کے ایک ادارہ سے وابستہ تھیں۔ نازیہ جو 13 اگست 2000 کو 35 سا ل کی عمر میں اس دنیا سے رخصت ہوگئیںان کی موت کی وجہ پھیپھڑوں کا کینسرتھا۔ نازیہ حسن نے بہت کم عمر پائی، لیکن اپنے مختصر کیریئر میں وہ نقوش چھوڑے ہیں جو آج بھی باقی ہیں ۔اشتیاق بیگ نے مزید بتایا کہ سن1995 میں میری اور نازیہ کی شادی ہوئی اور سن 2000 میں وہ اس دنیا سے چلی گئی۔نازیہ کے گھر والوں اور میرے درمیان اختلافات کی بہت سی وجوہات تھیں۔ نازیہ جانتی تھی کہ وہ کینسر میں مبتلا ہے اور اس کے پاس وقت کم ہے۔ نازیہ کی خواہش تھی کہ وہ ماں بنے۔ اس کی بیماری کی وجہ سے میں نے اسے سمجھایا بھی کہ ایسا ممکن نہیں ہے اس کی یہ خواہش پوری ہوئی اور ہمارا بیٹا پیداہوا جسکا نام اریض رکھا ۔ انہوں نے کہا کہ اس کی والدہ کو غلط فہمی تھی کہ میں اس کے پاپ سنگنگ کیریئر کے خلاف ہوں۔ہماری ذہنی ہم آہنگی بہت اچھی تھی۔ انہوں نے مزید بتایا نازیہ ایک بہت ذہین، حسین اور خوبصورت شخصیت کی مالک تھی۔ وہ جو محسوس کرتی تھی اس کا برملا اظہار کر دیتی تھی۔ دنیا کے لیے وہ ایک اسٹار سنگر تھی۔ میرے لیے وہ بہت اہم تھیں جو بہت پیار کرنے والی بیوی تھی جسے اپنی تمام ذمہ داریوں کا علم تھا۔ا شتیاق بیگ نے اس موقع پر وضاحت کرتے ہوئے کہا کہ ان کے حوالے سے بہت سی غلط فہمیاں پائی جاتی ہیں کہ انہوں نے نازیہ کو انتقال سے دس دن پہلے طلاق دے دی تھی،اس بات میں کوئی صداقت نہیں ہے۔وہ مرتے دم تک میرے نکاح میں تھی، جس کا ثبوت میرے پاس اب بھی موجود ہے۔نازیہ حسن کا فنی سفر تین اپریل 1965ء کو ہوا ۔کراچی میں پیدا ہونے والی نازیہ حسن نے اپنے انوکھے انداز سے پاکستان کی شوبز انڈسٹری میں بہت جلد اپنی جگہ بنائی۔ نازیہ حسن نے اپنے کیریئرکی شروعات 1975ء میں پی ٹی وی پر نشر ہونے والے بچوں کے ایک پروگرام کلیوں کی مالا سے کی، جہاں انہوں نے اپنا پہلا گانا دوستی ایسا ناتاگایا تھا۔ نازیہ حسن کا شمار برصغیر میں پاپ موسیقی کے اہم ترین گلوکاروں میں کیا جاتا ہے۔ انہوں نے موسیقی کی تعلیم معروف موسیقار سہیل رعنا سے حاصل کی، جس کے بعد وہ لندن چلی گئیں اور اپنی اعلٰی تعلیم وہیں مکمل کی۔ نازیہ حسن نے نا صرف پاکستان بلکہ پورے برصغیر میں اپنی گلوکاری سے اپنے آپ کو منوایا ۔ اب وہ اس دنیا میں نہیں ہے لیکن نازیہ حسن اپنے مداحوں کے دلوں میں آج بھی زندہ ہیں ۔
