افغان فورسز کی جانب سے چمن بارڈر پر بلا اشتعال فائرنگ کے حوالے سے پاک افغان ڈی جی ایم اوز کا ہاٹ لائن پر رابطہ ہوا ہے۔
آئی ایس پی آر کے مطابق ڈی جی ایم اوپاکستان میجر جنرل ساحر شمشادمرزا نے افغان فائرنگ اور گولہ باری کی مذمت کرتے ہوئے کہا ہے کہ افغان فورسز کی فائرنگ سے جانی نقصان ہوا۔ ڈی جی ایم او پاکستان کا مزید کہنا ہے کہ دیہات پاک افغان سرحد میں منقسم ہیں، پاک فوج اور شہری اپنی سرحد کے اندر موجود ہیں،ہم اپنی اپنی سرحدوں کےاندر کام کریں گے۔ آئی ایس پی آر کا کہنا ہے کہ افغان ڈی جی ایم او نے تسلیم کیا کہ پاک افغان سرحد دیہاتوں کے درمیان ہے۔
انہوں نے یقین دہائی کرائی کہ افغان فورسز اپنی سرحد کے اندر رہیں گی،جبکہ موجودہ تناؤ کم کیا جائے گا،معاملےکواٹھائیں گے اورضروری ہدایات جاری کریںگے۔ آئی ایس پی آر کے مطابق ہاٹ لائن رابطے کے بعد پاک افغان بارڈر فلیگ میٹنگ بھی ہوئی جبکہ اس وقت علاقے میں فائرنگ رک چکی ہے۔