حکومت کیخلاف روز اول سے ہی نیازی اینڈ پارٹی نے سازشوں کا تانا بانا بنا، پاکستانی سیاست میں سیاسی شعبدہ بازوں کی کوئی گنجائش نہیں: وزیراعلیٰ پنجاب شہبازشریف کا بیان
لاہور: وزیراعلیٰ پنجاب میاں شہباز شریف نے اپنے بیان میں کہا پاکستانی سیاست میں سیاسی شعبدہ بازوں کی کوئی گنجائش نہیں، انہوں نے کہا نیا پاکستان بنانے والوں نے ملک کا حلیہ بگاڑ کر رکھ دیا ہے۔ شہباز شریف نے کہا ہر معاملے پر یو ٹرن، دروغ گوئی اور منافقت ان کا معمول ہے، حکومت کے خلاف روز اول سے ہی نیازی اینڈ پارٹی نے سازشوں اور الزامات کا تانا بانا بنا۔ وزیراعلی پنجاب کا مزید کہنا تھا نواز شریف نے الزامات کی پرواہ کئے بغیر ترقی کا سفر تیزی سے جاری رکھا، عوام نے 3 بار نواز شریف پر بھرپور اعتماد کا اظہار کر کے انہیں وزیراعظم منتخب کیا۔ وزیراعلیٰ پنجاب نے مزید کہا نوازشریف وطن و عوام سے محبت کے باعث 20 کروڑ پاکستانیوں کے دلوں میں بستے ہیں، مستحکم اور پرامن پاکستان کیلئے تاریخی اقدامات کئے گئے۔ انہوں نے کہا گزشتہ 4 برسوں میں پاکستان نے جو اعلیٰ مقام حاصل کیا وہ سب کے سامنے ہے۔
