لاہور (ویب ڈیسک) سابق وزیراعظم نواز شریف نے پارٹی رہنماوں کو ہدایت کی ہے کہ تنظیم سازی میں مخلص ساتھیوں کو آگے لایا جائے اور کسی کی سفارش نہ مانی جائے۔ کوٹ لکھپت جیل میں نواز شریف سے ملاقات کا دن ! مریم نواز اور لیگی رہنماؤں کی بڑی تعداد قائد سے ملنے جیل پہنچی۔ ملاقات کے دوران نواز شریف نے پارٹی کی تنظیم سازی 15 جون تک مکمل کرنے کی ہدایت کر دی۔ سابق وزیر اعظم نے دیگر پارٹیوں سے ن لیگ میں شامل ہونے کے خواہشمندوں کو پارٹی میں شمولیت کی اجازت نہ دی۔ دوسری جانب سابق وزیراعظم میاں نواز شریف کی درخواست ضمانت عیدالفطر کے بعد سماعت کیلئے منظور کر لی گئی ہے۔ اسلام آباد ہائیکورٹ11 جون کو نوازشریف کی درخواست ضمانت پر سماعت کرے گی۔ اس سلسلے میں وفاق، سپرنٹنڈنٹ جیل کوٹ لکھپت اور نیب کو بھی نوٹسز جاری کر دیے گئے ہیں۔اسلام آباد ہائیکورٹ کے جسٹس عامر فاروق اور جسٹس محسن کیانی نواز شریف کی درخواست پر سماعت کرینگے۔رجسسٹرار اسلام آباد ہائیکورٹ کی جانب سے جاری کاز لسٹ کے مطابق جسٹس عامر فاروق اور جسٹس محسن اختر کیانی پر مشتمل دو رکنی بنچ نواز شریف کی درخواست ضمانت پر سماعت کرے گا۔ نواز شریف نے العزیزیہ ریفرنس میں سات سال قید اور جرمانوں کی سزا معطل کرکے طبی بنیادوں پر ضمانت پر رہا کرنے کی استدعا کر رکھی ہے۔نواز شریف نے تازہ میڈیکل رپورٹس، ملکی اورغیر ملکی ڈاکٹرز کے مشورے کو بنیاد بنا کر ضمانت منظور کرنے کی درخواست دائر کی ہے۔واضح رہے کہ اسلام آباد ہائیکورٹ اور سپریم کورٹ نواز شریف کی پرانی میڈیکل رپورٹس کی بنیاد پر ضمانت منظوری کی درخواستیں مسترد کر چکی ہیں۔گیارہ جون کی سماعت پر نیب اور سپریٹنڈنٹ کوٹ لکھپت جیل کے جوابات کے بعد نواز شریف کی ضمانت پر فیصلہ ہوگا۔
