اسلام آباد: آرمی چیف نے چیئرمین پاکستان کرکٹ بورڈ کے نام خط لکھا ہے جس میں پاکستان سپر لیگ کے کامیاب انعقاد پر ان کی تعریف کی ہے۔
تفصیلات کے مطابق آرمی چیف جنرل قمر جاوید باجوہ نے چیئرمین پاکستان کرکٹ بورڈ نجم سیٹھی کے لیے تعریفی خط لکھا ہے۔ جس میں آرمی چیف نے پاکستان سپر لیگ اور ویسٹ انڈیز سے سیریز پر نجم سیٹھی اور ان کی ٹیم کو مبارکباد دی ہے۔ خط میں آرمی چیف کا کہنا تھا کہ یہ نمایاں کامیابیاں پاکستان کرکٹ کے مستقبل کے لیے اہم ہیں۔ کامیابیاں سیکیورٹی صورتحال کی امیج کی بحالی کے لیے بھی اہم ہیں۔
آرمی چیف نے پی سی بی کے تمام عہدیداران کے لیے نیک خواہشات کا اظہار کرتے ہوئے کہا کہ پرامن امیج اجاگر کرنے کے لیے پاک فوج پی سی بی کے ساتھ ہے۔ واضح رہے کہ پاکستان سپر لیگ کا تیسرا ایڈیشن دبئی اور شارجہ میں منعقد کیا گیا تھا تاہم اس کے اختتامی دو میچز لاہور جبکہ فائنل کراچی میں منعقد کیا گیا۔ بعد ازاں ویسٹ انڈیز کی ٹیم بھی پاکستان آئی جس کے ساتھ تین ٹی ٹوئنٹی میچز کی سیریز کراچی میں منعقد کی گئی۔
