لاہور: لاہور بورڈ میں مجموعی طور پر پہلی پوزیشن حاصل کرنے والے طالبعلم وسیم یاسین کے والد انتقال کرچکے ہیں۔
وسیم یاسین پنجاب دانش سکول فار بوائز انڈ س ہائی وے روڈ فاضل پور ضلع راجن پور کا طالبعلم ہے۔ بتایا گیا ہے کہ وسیم یاسین کے سات بھائی اور چار بہنیں ہیں اور تمام اپنے بڑے بھائی کی زیر کفالت ہیں۔ لاہور بورڈ میں پہلی پوزیشن حاصل کرنے والے وسیم یاسین کی مستقبل میں میڈ یکل کے شعبے سے وابستہ ہونے کی خواہش ہے۔ وسیم یاسین نے 1091 نمبر لے کر بورڈ میں مجموعی طور پر پہلی پوزیشن حاصل کی۔ 1091 نمبر لے کر مشترکہ طور پر پہلی پوزیشن حاصل کرنے والے دوسرے طالبعلم توصیف افضال کے والد ایک دکان چلاتے ہیں۔ توصیف افضال کی بھی میڈیکل کی تعلیم حاصل کرنے کی خواہش ہے۔بورڈ میں 1090 نمبر لے کر مجموعی طور پر دوسری پوزیشن حاصل کرنے والے محمد ہاشم فیصل کے والد ڈاکٹر ہیں اور ہاشم فیصل کی بھی اسی شعبے کو جوائن کرنے کی خواہش ہے۔بورڈ میں 1090 نمبر لے دوسری پوزیشن حاصل کرنے والی وجیہ اسلم کے والد پراپر ٹی ڈیلر ہیں۔ وجیہ کی والدہ نے ٹیلیفون پر گفتگو کرتے ہوئے بتایا کہ ابھی ہم سب بہت خوش ہیں اور وجیہ آگے کس شعبے میں جائے گی اس بارے ابھی کچھ نہیں سوچا۔لاہور بورڈ میں 1089 نمبر لے کر مجموعی طو رپر تیسری پوزیشن حاصل کرنے والی حفصہ سلیم قصور کی رہائشی ہے اور اس کے والد ایک دکان چلاتے ہیں۔ طالبہ نے انجینئربننے کی خواہش کااظہار کیا ہے۔ رابطہ کے دوران پوزیشن حاصل کرنے والے طلبہ نے سیاست کے حوالے سے بیزاری کا اظہار کرتے ہوئے کہا کہ اس کیلئے کروڑوں روپے چاہئیں جبکہ ہمار ے ملک میں جس طرح کی سیاست ہوتی ہے یہ ہمارے بس کی بات نہیں۔
