منگنی توڑ کر چھوٹی بہن سے شادی، دوشیزہ نے بہنوئی کو چھری مار دی

تھانہ سول لائن کے علاقہ میں لڑکی نے منگنی توڑ کر چھوٹی بہن سے کورٹ میرج کرنیوالے کو چھری کے وار کرکے زخمی کر دیا۔ بتایا گیا ہے کہ محلہ شوکت آباد کا رہائشی وقاص بڑی بہن فروا سے منگنی توڑ کر اسکی چھوٹی بہن انعم کو گھر سے لے گیا اور کورٹ میرج کرلی تھی، طویل عرصہ کے بعد گزشتہ روزانعم اپنے خاوند وقاص کے ہمراہ میکے آئی تو اسکی بڑی بہن سابق منگیتر کو دیکھ کر آپے سے باہر ہوگئی اور اس پر چھری کے وار کر دئیے، وقاص کو زخمی حالت میں سول ہسپتال منتقل کردیا گیا ہے۔

ملزمہ فروا نے تھانہ سول لائنز میں پولیس اور میڈیا کو اپنے چہرے اور جسم پر لگنے والی چوٹیں دکھاتے ہوئے بتایا کہ وقاص اپنی بیوی انعم کے ہمراہ کافی عرصے کے بعد اپنے والدین سے ملنے آیا تو وہ بھی بہن سدرہ اور سہیلی کے ہمراہ انعم کو ملنے اس کے سسرال جا پہنچی جہاں اسکے بہنوئی وقاص اور گھر والوں نے تینوں کو زدو کوب کیا اور بعد ازاں وقاص نے خود کو چھری مار لی، تا کہ میرے خلاف جھوٹا پرچہ کرایا جاسکے۔