Humaima Malik

فنون لطیفہ انہی پنچھیوں کی طرح ہے جن کی کوئی سرحد نہیں ہوتی‘ وہ کہیں بھی اڑجائیں وہ آزاد فضاء میں سانس لینا پسند کرتے ہیں
میں نے اپنے فنی سفرکا آغاز پاکستان میں کیا لیکن میرا فن مجھے پڑوسی ملک بھارت تک لے گیا‘انٹرویو
لاہور(پی ایم این ) اداکارہ وماڈل حمائمہ ملک نے کہا ہے کہ فن اورفنکاروں کو سرحدوں میں قید نہیں کیا جاسکتا۔ فنون لطیفہ انہی پنچھیوں کی طرح ہے جن کی کوئی سرحد نہیں ہوتی ۔ وہ کہیں بھی اڑجائیں وہ آزاد فضاء میں سانس لینا پسند کرتے ہیں۔اگران کو قید کردیا جائے تووہ زندہ نہیں رہ سکتے۔ ان خیالات کااظہار انھوں نے اپنے ایک انٹرویومیں کیا۔ انھوں نے کہا کہ میں نے اپنے فنی سفرکا آغاز پاکستان میں کیا لیکن میرا فن مجھے پڑوسی ملک بھارت تک لے گیا۔ کچھ فلم میکرز نے میرا کام سلورسکرین اور چھوٹی سکرین پردیکھااورپھر مجھے بالی وڈ میں کام کی پیشکش ہونے لگی۔ کہیں بھی کام کروں اپنے ملک کا نام روشن کرنا ہی میرا مشن ہے۔ سب جانتے ہیں کہ بالی وڈ اب دنیا کی دوسری بڑی فلم انڈسٹری بن چکی ہے اوروہاں پردنیا کے بیشترممالک سے تعلق رکھنے والے فنکارکام کرنے کے لیے آتے ہیں اور میں محنت پر یقین رکھتی ہوں۔ ایسے میں بالی وڈفلموں میں کام کی پیشکش ہونا اعزاز کی بات تھی۔اسی لیے میں مانتی ہوں کہ فن اورفنکارکی کوئی سرحد نہیں ہوتی۔انھوں نے کہا کہ اس وقت میں بالی وڈ اورپاکستان میں بننے والی کثیرسرمائے کی فلموں میں اہم کردارادا کررہی ہوں۔ان میں دوپروجیکٹ بالی وڈ کے ہیں اوردوہی پاکستانی فلمیں ہیں۔ اس وقت میں پاکستانی فلموں کی شوٹنگزمیں حصہ لے رہی ہوں۔ دونوں ہی فلمیں کہانی اورمیرے کردارکے اعتبارسے بہت منفرد ہیں اورمجھے امید ہے کہ ان فلموں کوپاکستان ہی نہیں بلکہ دنیا کے بیشترممالک میں بھی زبردست رسپانس ملے گا۔جہاں تک بات بالی وڈ کی ہے تووہاں پربننے والی فلموں کی پروموشن اوران کی ریلیزنگ دنیا کے بہت سے ممالک میں بیک وقت ہوتی ہے۔ وہ بہت بڑی فلم انڈسٹری ہے اوروہاں پربنائی جانیوالی فلموں کے بجٹ بہت زیادہ ہوتے ہیں۔ لہذا بالی وڈ فلموں سے بھی مجھے بہت سی توقعات ہیں لیکن فی الوقت میرا سارا فوکس اپنی پاکستانی فلموں پرہے۔ایک سوال کے جواب میں حمائمہ ملک نے کہا کہ بالی وڈ ہویا ہالی وڈ مجھے اچھا کام کرنا ہے۔ اگرمجھے ہالی وڈ میں کام کرنے کی پیشکش ہوئی تومیں ضرور کام کرون گی۔ میں پاکستانی ہوں اورمیرا ماننا ہے کہ پاکستانی قوم ہر لحاظ سے باصلاحیت ہے۔ ہم بے پناہ وسائل کی کمی کے باوجود بھی اپنی صلاحیتوں سے پاکستان کا نام روشن کرنے کا ہنر خوب جانتے ہیں۔