Abrar ul Haq

لاہور (جیوڈیسک) ابرار الحق بھی پلے بیک سنگر بن گئے۔ تفصیل کے مطابق معروف نغمہ نگار ایس ایم صادق نے بھارتی پنجابی فلم ’’عشق میرا ریلیجن‘‘ کے لیے ابرار الحق کی آواز میں دوگانے ریکارڈ کیے ہیں۔

ایس ایم صادق نے بتایا کہ ابرارالحق ہمارے ملک کی بہترین فوک آواز ہے جو ہر عمر کے افراد میں بے حد مقبول ہیں ۔ اسی لیے انھیں بطور پلے بیک سنگر دوگانے ریکارڈ کیے ہیں جو ان کے سننے والوں کو بے حد پسند آئیں گے۔

انھوں نے مزید بتایا کہ اسی فلم کے لیے راحت فتح علی خان کی آواز میں بھی دوگانے ریکارڈ کیے گئے ہیں۔ایک سوال کے جواب میں ایس ایم صادق نے بتایا کہ ’’عشق میرا ریلیجن‘‘ کے علاوہ فرار سمیت متعدد بھارتی فلموں کے لیے گانے لکھ رہا ہوں۔

ان میں بھی راحت فتح علی خان سمیت دیگر سنگرز کی آواز میں گانے ریکارڈ کیے جائیںگے۔ یاد رہے کہ اس سے قبل ایس ایم صادق شوکت علی، عارف لوہار کی آواز میں بھی بھارتی فلموں کے لیے گانے ریکارڈ کر چکے ہیں جب کہ پچھلے سال فلم ’’جٹ اینڈ جیمز بانڈ‘‘ کے لیے انھی کے لکھے گیت بہت مقبول ہوئے تھے جن پر ایس ایم صادق بہترین نغمہ نگار کی کیٹگری کے لیے نامزد بھی ہوئے تھے۔