بولی وڈ اداکار ابھیشیک بچن اور اداکار ایشوریا رائے بچن کی جوڑی کا شمار انٹرٹینمنٹ انڈسٹری کی کامیاب جوڑیوں میں کرنا کوئی غیر مناسب بات نہیں کیونکہ ان کی شادی شدہ زندگی کی مثالیں بولی وڈ انڈسٹری میں دی جاتی ہیں، اس کے ساتھ ساتھ یہ دونوں ایک ساتھ کئی کامیاب فلموں کا حصہ بھی بن چکے ہیں اور اب ابھیشیک بچن عموماً اپنی خوبصورت اہلیہ کے لیے محبت کا اظہار کرتے نظر آتے رہتے ہیں، تاہم اب انہوں نے ایک انٹرویو میں اپنی اہلیہ کے ساتھ کی گئی فلموں سے ایک حیرت انگیز انکشاف بھی کردیا۔جہاں اس وقت بولی وڈ میں اداکاروں کو اداکاراؤں سے زیادہ معاوضہ ملنے کے حوالے سے بحث جاری ہے، وہیں ابھیشیک بچن نے بھی اس متعلق اپنی رائے کا اظہار کردیا۔اداکار نے ایک انٹرویو میں بتایا کہ ’اداکاروں اور اداکاراؤں کو برابر معاوضہ ملنے کی بحث اس وقت انڈسٹری میں جاری ہے، میں نے اپنی اہلیہ کے ساتھ 9 فلموں میں کام کیا، جن میں سے 8 میں ایشوریا رائے کو مجھ سے زیادہ معاوضہ دیا گیا‘۔واضح رہے کہ ابھیشیک بچن اور ایشوریا رائے نے ایک ساتھ ’دھوم 2‘، ’امراؤ جان‘، ’گرو‘، ’کچھ نہ کہو‘، ’ڈھائی اکشر پریم کے‘، ’سرکار راج‘، راون‘ جیسی فلموں میں کام کیا۔ابھیشیک نے مزید کہا کہ ’فلم پیکو میں سب سے زیادہ معاوضہ حاصل کرنے والی اداکارہ دپیکا پڈوکون تھیں‘۔یاد رہے کہ 2015 کی فلم ’پیکو‘ میں ابھیشیک بچن کے والد امیتابھ بچن اور عرفان خان نے بھی دپیکا پڈوکون کے ہمراہ مرکزی کردار ادا کیے تھے۔یہ دونوں بہت جلد ایک ساتھ فلم ’گلاب جامن‘ کی شوٹنگ کا بھی آغاز کریں گے، جو اگلے سال ریلیز ہوگی۔ان دونوں کی ایک ساتھ فلم 8 سال بعد سامنے آئے گی۔ ابھیشیک بچن نے اس معاملے پر مزید روشنی ڈالتے ہوئے کہا کہ ’یہ کاروبار ہے اور اگر آپ ایک ایسے اداکار ہیں جسے زیادہ پسند کیا جاتا ہے اور جس کی زیادہ مانگ ہے تو آپ کو اس ہی حساب سے معاوضہ ملتا ہے، ایسا نہیں ہوسکتا کہ آپ ایک نئی اداکارہ ہوں اور آپ یہ مطالبہ کرنے لگیں کہ آپ کو شاہ رخ خان جتنا معاوضہ دیا جائے‘۔ابھیشیک اور ایشوریا کی شادی 2007 میں ہوئی تھی، جس کے بعد 2011 میں ان کی بیٹی ارادھیا کی پیدائش ہوئی جو اب 6 سال کی ہے۔یہ دونوں ایک ساتھ بہت سی فلموں میں کام کرچکے ہیں۔
