واشنگٹن: امریکا کی مغربی ریاست ایریزونا کے ایک سیا حتی مقام پر اچانک آنے والے سیلابی ریلے میں 9افراد ہلاک اورایک نوجوان لاپتہ ہوگیا۔
حکام کے مطابق یہ واقعہ ایریزونا کے ٹونٹو نیشنل فاریسٹ میں دریائے ورڈی پر موجود ایک گھاٹی میں پیش آیا جو تیراکی کے شوقین افراد کی پسندیدہ جگہ ہے۔ اطلاعات کے مطابق سیاحوں کو حکام کی جانب سے سیلابی ریلے کے خدشے سے پیشگی آگاہ نہیں کیا گیا تھا۔ علاقے میں امدادی سرگرمیوں کے نگراں ادارے کے سربراہ رون سیٹل مائیر نے بتایا ہے کہ اچانک آنے والا سیلابی ریلا گھاٹی میں موجود تیراکوں اور وہاں پکنک منانے والے کم از کم 10افراد کو اپنے ساتھ بہا لے گیا۔ امدادی کارکنوں نے دریا سے 9افراد کی لاشیں برآمد کرلی ہیں جبکہ 13سالہ بچہ تاحال لاپتہ ہے۔ ہلاک ہونے والوں 4 نوجوان اور 5بچے شامل ہیں۔ مقامی روزنامے کے مطابق تمام ہلاک شدگان کا تعلق ایک ہی خاندان سے ہے۔ حکام کا کہنا ہے کہ واقعے کے وقت گھاٹی میں 100سے زائد افراد موجود تھے جن میں سے 10 کے علاوہ باقی سب بچ نکلنے میں کامیاب ہوگئے۔
