لکی مروت(مانیٹرنگ ڈیسک) پاکستان تحریک انصاف کے سابق نائب ضلع ناظم عرب خان نے جمعیت علمائے اسلام (ف) کی ڈنڈا بردار فورس کے مقابلے میں انصاف ٹائیگر فورس تشکیل دے دی۔پریس کانفرنس کے دوران عرب خان نے بتایا کہ مخصوص شرٹس اور مخصوص ڈنڈوں سے لیس فورس پی ٹی آئی کے رہنماؤں اور کارکنوں کی حفاظت کرے گی۔انہوں نے بتایا کہ فورس پاک فوج کے شانہ بشانہ کھڑی ہو گی اور لکی مروت کی حدود میں جمعیت علماء اسلام کے انصار السلام فورس کے شر سے عوام کو محفوظ رکھنے کے فرائض سرانجام دے گی۔پی ٹی آئی رہنما کے مطابق فورس لکی مروت میں آزادی مارچ میں شامل شرپسند عناصر کا قلع قمع بھی کرے گی اور رہنماؤں کی حفاظت کیلئے ہر قسم کی قربانی کیلئے تیارہے۔انہوں نے کہا کہ ابھی صرف آغاز ہے، ایک دو دنوں میں ہزاروں رضاکار تیار ہو جائیں گے۔عرب خان نے کہا کہ پرامن احتجاج سب کا حق ہے لیکن کسی کو قانون ہاتھ میں نہیں لینے دیں گے۔ دوسری جانب وزارت داخلہ کی جانب سے جمعیت علمائے اسلام کی ذیلی تنظیم انصار الاسلام پر پابدنی عائد کر دی گئی ہے جس کا نوٹیفکیشن بھی جاری کر دیا گیا ہے، وزارت داخلہ کی جانب سے جاری نوٹیفکیشن میں کہا گیا ہے کہ جے یو آئی ف کی انصار الاسلام فورس قانون کی خلاف ورزی کا سبب بن سکتی ہے، پرائیوٹ ملٹری گروپ کا قیام آئین کے آرٹیکل 256 کی خلاف ورزی ہے، صوبوں کو انصارالاسلام تنظیم کے خلاف کاروائی کی ہدایت بھی کر دی گئی ہے۔ وزارت داخلہ کی جانب سے انصار الاسلام پر پابندی کے بعد مولانا فضل الرحمان بھی میدان میں آگئے ہیں اور حیران کُن رد عمل دے ڈالا ہے۔ مولانا فضل الرحمان کی جانب سے وزارت داخلہ کے نوٹیفکیشن کو مسترد کر دیا گیا ہے، اس حوالے سے مولانا فضل الرحمان کا کہنا تھا کہ ہم اس کا مقابلہ کریں گے ہر سیاسی جماعت میں ونگ موجود ہوتا ہے، جو تنظیمیں تم نے اپنے پروں کے نیچے پال رکھی ہیں پہلے انہیں کنٹرول کرو، جن لوگوں کو تم خود پال رہے ہو پہلے انہیں نکالو اتنی بُزدل حکومت میں نے آج تک نہیں دیکھی ، آزادی مارچ کا آغاز ستائیس اکتوبر کو لاڑکانہ سے کریں گے جس کے بعد یہ مارچ اکتیس اکتوبر کو وفاقی دارالحکومت اسلام آباد میں داخل ہوگا، لیکن حکومت جو ہمارے مارچ کو روکنے کے لیے طریقے استعمال کر رہی ہے اس سے صورتحال کشیدہ ہوگی ، ہم اپنے شیڈول سے ٹس سے مس نہیں ہونگے، اس مارچ میں صرف جمعیت نہیں بلکہ ہر جماعت کے کارکن، سیاسی رہنماء اور عام پاکستانی شامل ہونگے۔
