چیمپئںنز ٹرافی میں پاکستان کے ہاتھوں شکست پر بھارت میں طوفان برپا ہوچکا ہے اورجہاں بھارتی میڈیا پاکستان کی اس کامیابی پر کھسیانی بلی کی طرح کھمبا نوچ رہا ہے وہیں اب انتظامیہ سے بھی پاکستان کی جیت ہضم نہیں ہورہی۔
غیر ملکی خبر رساں ادارے کے مطابق بھارتی ریاست مدھیا پردیش کے ضلع برہان پور میں پاکستان کی جیت کا جشن منانے والے 15 افراد کو منگل کے روز گرفتار کیا گیا۔ گرفتار کیے جانے والے تمام افراد مسلمان ہیں جن کی عمریں 19 سے 35 سال ہیں جب کہ پولیس نے ان پر بغاوت کا مقدمہ درج کیا ہے۔ بھارت میں اس مقدمے میں نامزد افراد کا پاسپورٹ منسوخ اور انہیں سرکاری نوکری کے لیے نااہل قرار دیا جاتا ہے جب کہ انہیں عمر قید تک کی سزا ہوسکتی ہے۔
ضلع برہان پور میں 60 فیصد آبادی مسلمانوں کی ہے جہاں اتوار کے روز چیمپئنز ٹرافی کے فائنل میں بھارت کی شکست کے بعد جشن منایا گیا۔ پاکستان کی فتح پر آتش بازی کی گئی اور پاکستان کے حق میں نعرے بھی لگائے گئے جس پر مقامی ہندووں نے پولیس کو شکایت درج کرادی۔ پولیس کے مطابق ان تمام افراد کو مقامی لوگوں کی شکایت پر گرفتار کرکے ان کے خلاف مجرمانہ سازش کا مقدمہ بھی درج کیا گیا ہے۔ پولیس نے الزام عائد کیا ہے کہ گرفتار افراد نے حساس مقام پر کئی گھنٹے تک جشن منایا۔ پولیس نے گرفتار افراد کو عدالت کے سامنے پیش کیا جس کے بعد انہیں جیل بھیج دیا گیا۔
خیال رہے کہ پاکستان کی جیت پر جشن منانے پر بھارت کی جانب سے اس طرح کے اقدامات اکثر دیکھنے میں آتے ہیں۔ اس سے قبل 2014 میں پاکستان کے ہاتھوں بھارت کو شکست کے بعد جشن منانے والے 60 طالب علموں کو بھی گرفتار کرکے ان کے خلاف بغاوت کا مقدمہ درج کیا گیا تھا۔
