اسلام آباد: سابق وزیر اعظم نواز شریف نے ماضی کی سازشوں سے پردہ اُٹھانے کا فیصلہ کر لیا ہے۔ قومی اخبار میں شائع رپورٹ کے مطابق سابق وزیراعظم نواز شریف کے جلا وطنی کے لیے معاہدوں، ورزائے اعظم ، صدور کے خلاف سازشوں کا کچا چٹھا کھولنے کا فیصلہ کر لیا گیا ہے

نواز شریف اپنے پُرانے ادوار سے لے کر آج تک اپنی حکومتوں کے خاتمے کا ذمہ دار اہم ترین ادارے کو قرار دینے پر نواز شریف کا کچہ چٹھہ کھولنے کا فیصلہ ہو چکا ہے۔ذرائع نے بتایا کہ نواز شریف کے حوالے سے اہم چیزیں یکم جون کے بعد منظر عام پر لائی جائیں گی ، نواز شریف نے پہلی مرتبہ وزیرا علیٰ بننے کے لیے کس کی مدد حاصل کی اور سابق وزیر اعظم مرحوم محمد خان جونیجو کو اقتدار سے کس طرح علیحدہ کیا، اس کے لیے کیا کیا سازش کی، اس حوالے سے اہم ثبوت سامنے لائے جائیں گے۔ ذرائع کے مطابق سابق صدر غلام اسحاق خان، سابق صدر فاروق لغاری، ان دونوں کے خلاف ان کو ہٹانے کے لیے کس طرح اہم ترین اداروں سے مدد مانگی گئی اور ان سے کیا درخواست کی گئی، اور کس طرح خود اہم ترین اداروں کو ان معاملات میں مداخلت کے لیے بلوایا گیا۔اس حوالے سے بھی اہم ثبوت سامنے لائے جارہے ہیں سابق صدر پرویز مشرف کے حوالے سے کئی ایسی اہم چیزیں سامنے لائی جارہی ہیں جس میں یہ ثابت ہوگا کہ خود نواز شریف اس معاملے میں کیا چاہتے تھے، اور ان کی مرضی سے کیا کیا ہوا۔

کئی ایسے معاہدوں کو بھی سامنے لائے جانے کی توقع ہے جو ابھی تک منظر عام پر نہیں آئے۔ ان میں کئی ایسے خطوط اور دستاویزات شامل ہیں جو نہ صرف نواز شریف کی پریس کانفرنس کی نفی کریں گی بلکہ کئی ایسی چیزیں بھی سامنے آئیں گی جس سے یہ ثابت ہوگا کہ نواز شریف نے کئی مرتبہ اہم ترین اداروں کو مختلف چیزوں میں ملوث کرنے کے لیے نہ صرف درخواست بھی کی بلکہ کئی مرتبہ تو اپنے چند ساتھیوں کو بھی ان کی مدد لینے کے لیے بھیجا۔ذرائع کے مطابق سابق وزیراعظم نواز شریف نے کتنی مرتبہ اہم اداروں کو سیاست میں ملوث کرنے کی کوشش کی ، اس حوالے سے بھی اہم ثبوت سامنے لائے جا رہے ہیں۔ جبکہ پنجاب کے اندر کالعدم تنظیموں سے روابط اور جنوبی پنجاب میں پولیس کے ذریعے ان کو تحفظ دینے کے حوالے سے بھی اہم ثبوت سامنے لائے جائیں گے۔ میڈیا رپورٹ میں مزید کہا گیا کہ ذرائع نے یہ بھی بتایا کہ سابق وزیر اعظم کے غیر ملکی قوتوں سے رابطوں کے حوالے سے بھی چیزیں سامنے لائی جائیں گی۔