لاہور (ویب ڈیسک ) پاکستانی اداکارہ ریما ویسے تو کروڑوں پاکستانیوں کے دلوں پر راج کرتی ہیں ۔ مگرآج معلوم ہوا کہ وہ جیل حکام کے دلوں میں بھی خوب بستی ہیں ۔ پنجاب کے ایک اعلیٰ افسر نے جیل کا دورہ کرنے والی اداکارہ ریما خان کو گارڈ آف آنر کا تحفہ پیش کردیا۔ 23 مارچ کو صدر مملکت کے ہاتھوں پرائڈ آف پرفارمنس پانے والی اداکارہ ریما کو لاہور میں جیل کے دورے کے موقع پر گارڈ آف آنر پیش کیا گیا۔ اداکارہ ریما خان کو جیل میں گارڈ آف آنر پنجاب کے اعلیٰ عہدے پر فائز بیوروکریٹ کے حکم پر دیا گیا ۔ منظر عام پر آنے والی ویڈیو میں اداکارہ کو کسی وزیر داخلہ یا وزیر قانون کی طرح گارڈ آف آنر کا معائنہ کرتے ہوئے دیکھا جاسکتا ہے۔خیال رہے کہ گارڈ آف آنر غیر ملکی مہمانوں، وزیر اعظم، صدر ، وزیر داخلہ سمیت دیگر حکومتی شخصیات کو دیا جاتا ہے لیکن اداکارہ ریما خان کو کس بنا پر گارڈ آف آنر پیش کیا گیا اس کا جواب انہیں اس اعزاز سے نوازنے والے ہی دے سکتے ہیں۔ یاد رہے کہ اس سے قبل بھی ایک خبر یہ تھی کہ اداکارہ مہوش حیات کو صدارتی ایوارڈ کیوں دیا گیا ۔ ان کی ایسی کون سی خدمات ہیں جس پر ان کو صدارتی ایوارڈ دیا گیا ؟ اس تنقید پر مہوش حیات کے ساتھی اداکار بھی ان کے حق میں بول پڑے تھے ۔ اور کہا تھا کہ اس میں کوئی بری بات نہیں کہ مہوش حیات کو صدارتی ایوارڈ مل رہا ہے ۔ اور اب اداکارہ ریما کی یہ ویڈیو وائرل ہوئی ہے ۔ جس میں دیکھا جا سکتا ہےکہ وہ ایک جگہ بطور مہمان خصوصی شریک ہیں جہاں پولیس کے دستوں نے انھیں گارڈ آف آنر پیش کیا ۔ جس کی ویڈیو سوشل میڈیا پر خوب گردش کر رہی ہے ۔